МАХН-ын дарга Н.Энхбаярыг маргааш Сүхбаатар дүүргийн шүүхэд 10.00 цагаас шүүнэ. Түүнтэй хамт До.Чулаанбаатар, Ж.Мягмаржаргал, Д.Дуламсүрэн нарыг мөн шүүх юм. Тэдэнд Эрүүгийн хуулийн тусгай ангийн 150.3, 263.2-т заасан хүндэвтэр зүйл ангиар эрүү үүсгээд байсан бол 243.2-т заасан мөрийтэй тоглох гэсэн зүйл анги нэмсэн байв. Энэ талаар улсын яллагч Е.Сагсайгаас тодруулахад “243.2-т заасан зүйл анги бол Н.Энхбаяр нарт биш. Ж.Мягмаржаргал нарт нэмэгдсэн зүйл анги” гэсэн хариултыг өглөө. Маргааш болох хуралд даргалагч шүүгчээр С.Соёмбо-Эрдэнэ, М.Алдар, С.Оюунчимэг, улсын яллагчаар Е.Сагсай, О.Мөнхбаатар, өмгөөлөгчөөр Г.Оюунцэцэг, Л.Өлзийхүү, Ц.Цэрэнжээ, К.Бауржан, О.Сайнгэрэл нар оролцох юм.
Хэрвээ шүүхээр гэм буруутай нь тогтоогдвол хуулийнхаа дагуу бүх эд хөрөнгийг хурааж, тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таваас дээш арван жил хүртэл хугацаагаар хорих ялаар шийтгүүлэх аж.
Б.Чимэг
