Фалуньгун хэмээх хийн дасгал, бясалгалаар хичээллэдэг Өвөр Монголын оршин суугч, монгол үндэстэн Ван Ся хэмээх бүсгүй Хятадын шоронд нас баржээ. Түүнийг хориотой шашин шүтдэг гэсэн үндэслээр сар гаруйн өмнө баривчлаад байв. Төрөл төрөгсдөд нь мэдэгдэлгүйгээр талийгаачийн цогцсыг чандарласан төдийгүй өвчний түүхийг нь ч үзүүлэхийг хориглосон байна. Ар гэрийнхэн нь энэ тухай интернетээр олон улсад мэдээлсэн учир ард нь үлдсэн нөхөр, хүүхдүүд болон хөгшин настай эцэг эхэд нь улсаас мөнгөн тусламж үзүүлэхээс татгалзжээ.

   Ван Ся нь ӨМӨЗО-ы Баяннуур аймгийн Линьхэ хошуунд амьдардаг байв. 4 сарын 27-нд орон нутгийн цагдаа нар түүнийг баривчилжээ. Өмнө нь ч 2002 ба 2011 онд мөн сүсэг бишрэлээс нь болж баривчилж байсан байна. Сүүлийн удаа шоронд хоригдоод сар хагасын дараа бөөрний дутагдлын улмаас комд орсон гэж хорих газрынхан мэдэгдэж байгаа юм. Ийнхүү 38 насандаа тэрээр насан эцэслэж, ард нь насанд хүрээгүй хоёр хүүхэд нь өнчирч үлджээ.
   Үхлийн шалтгаан болон нөхөн төлбөр олгох баримт бичигт ар гэрийнхэн нь гарын үсэг зурахаас татгалзан задлан шинжилгээ хийхийг шаардсан ч үр дүнд хүрээгүй байна. Хошууны төв эмнэлэг ч Ван Ся агсны өвчний түүхийг гэрийнхэнд нь өгөхөөс татгалзжээ. Харин Амрыг хамгаалах хэлтсээс ”1.Ван Ся нь ар гэрийнх нь үзэж байгаачлан эрүү шүүлт, тамлалтаас болж биш өвчний улмаас нас нөгчсөн. 2.Төрөл төрөгсдөд нь өвчний түүхийг нь өгөхгүй. (Шалтгаан дурдаагүй.) 3. Ван Ся агсны үхлийн тухай мэдээллийг интернет ашиглан хилийн чанадад өргөнөөр тараасан тул нэн ядуу гэр бүл, үр хүүхдүүд, эцэг эхэд нь нөхөн төлбөр олгохгүй. Зөвхөн оршуулгын зардал 20 мянган юань олгоно” гэсэн хариу өгсөн байна.

   Гэр бүлийнх нь хууль ёсны шаардлагыг үл хэрэгсэн эрх баригчид 7 сарын 5-нд шарилыг нь чандарласнаар гэмт хэргийн бүх ул мөрийг баллан дарагдууллаа гэж төрөл төргсөд нь үзэж байгаа ажээ.
-Бид соёлт ертөнцөд амьдарч байгаа. Гэхдээ манай улсад ийм харгис явдал гарсаар байна. Жирийн хүний амь сохор зоосны үнэгүй болохыг үзлээ. Одоо шударга ёсыг Тэнгэрээс хүсч хүлээх л үлдлээ гэж талийгаачийн нөхөр хэлж байна.
Өөрийгөө боловсруулах, бясалгах дасгал гэж дагагсад нь тайлбарладаг Фалуньгун урсгалыг Хятадын Коммунист намын гишүүдээс олон буюу 70 гаруй сая гишүүнтэй болоход нь 1999 онд Хятадын эрх баригчид албан ёсоор хориглож сая сая итгэгчдийг нь шоронд хорих болсон юм.
    Бээжингийн өмгөөлөгч Зя овогт болсон явдлыг ингэж тайлбарлаж байна:
-Шоронд нас барсан хүний ар гэрийнхэн өвчний түүхтэй нь танилцаж, задлан шинжилгээ хийг шаардах эрхтэй. Задлан хийхээс татгалзан чандарласан бол захиргааны хариуцлага хүлээх ёстой. Хоригдож байхдаа амиа алдсан бол засаг 600 мянган юань (95 мянган ам.доллар)-ийн нөхөн төлбөр төлж насанд хүрээгүй хүүхдүүд болон өндөр настай эцэг эхэд нь тэтгэмж олгох хуультай.
Фалуньгуныг мөрдөн хавчихыг олж тогтоох байгууллагын мэдээгээр Ван Ся нь сүсэг бишрэлээсээ болж 2002 онд 7 жилийн ял авч байжээ. 2004 онд эрүү шүүлтийн улмаас бие нь муудаж, шоронгийн эмчийн хэлснээр 2-3 хоногийн нас үлдэхэд нь хариуцлага хүлээхгүйн тулд хорих газрынхан түүнийг хугацаанаас нь өмнө буюу “гэрт нь үхүүлэхээр” сулласан байна.
Гэртээ ирсэн Ван дахин Фалуньгунаар хичээллэх болж бие нь илааршжээ. 2011 оны 3 дугаар сард Хангин хошууны шоронд түүнийг дахин хорьж дормжлон эрүүдэж байжээ.