Энэ оны эхний хагас жилийн  байдлаар 27,1 мянган аж ахуйн нэгж байгууллага,   613,2  мянган заавал даатгуулагч хамрагдаад байна.  Үүнийг өнгөрсөн оны мөн үетэй  харьцуулвал нийгмийн даатгалд шимтгэл төлөгч ажил олгогчийн тоо 3,8 мянган аж ахуйн нэгжээр, даатгуулагчдын тоо  43,2  мянган хүнээр нэмэгдсэн байна. Мөн  нийгмийн даатгалд хамрагдсан сайн дурын даатгуулагчдын тоо 19,1 мянган  даатгуулагчаар өсч  72,5 мянгад хүрээд байна. Эхний хагас жилийн хугацаанд нийгмийн даатгалд шинээр  2,6  мянган ажил олгогч, 11,6 мянган даатгуулагч хамрагдаад байна. Тэгвэл эрүүл мэндийн даатгалд хамрагсдын тоо өмнөх оны мөн үеэс 75,3 мянган хүнээр нэмэгджээ. Энэ нь манай улсын хүн амын 60 орчим хувь нь буюу 1.6 сая хүн эрүүл мэндийн даатгалд хамрагдсан гэсэн үзүүлэлт юм.  Энэ оны эхний хагас жилийн байдлаар нийгмийн даатгалын сангаас тэтгэвэр, тэтгэмж, эрүүл мэндийн тусламж үйлчилгээнд зориулж нийтдээ 404,1  тэрбум төгрөг зарцуулаад байна. Ингэхдээ нийгмийн даатгалын сангаас 305,1 мянган тэтгэвэр авагчдад 324,2 тэрбум төгрөг, 78,7 мянган  жирэмсний болон амаржсаны,  хөдөлмөрийн чадвар түр алдсаны,  оршуулгын, ажилгүйдлийн тэтгэмж авагчдад  21,7 тэрбум төгрөг зарцуулжээ. Мөн 1995 оноос өмнө  тэтгэвэр тогтоолгосон иргэдийн болон цэргийн тэтгэвэрт зориулж 123.8 тэрбум төгрөгийг  тэтгэврийн даатгалын санд улсын төсвөөс шилжүүллээ. Ийнхүү 2012  оны эхний хагас жилийн  байдлаар  нийгмийн даатгалын  таван төрлийн санд 353.9  тэрбум  төгрөгийн шимтгэлийн орлого төвлөрүүлж, орлогын төлөвлөгөөг 121.1 хувиар биелүүлж, давхардсан тоогоор 1989.1 мянган иргэнд  тэтгэвэр, тэтгэмж, эрүүл мэндийн тусламж үйлчилгээ үзүүлээд байна.
                                                                                                                                                                                    Ц.Болор