Хамтарсан Засгийн газар байгуулах Ардчилсан нам болон “Шударга ёс” эвслийн хэлэлцээр мухардалд орсны улмаас түр завсарлаад байна. Ардчилсан намын удирдлагад ойрхон эх сурвалж 24tsag.mn-д мэдэгдэхдээ санал болгосон 4 яамны сайдыг МАХН-МҮАН-ын “Шударга ёс” эвсэл 5 болгох болзол тулгасныг АН хүлээн авахаас татгалзсан нь хэлэлцээрийн үндсэн санал зөрөлдөөн болоод байгаа ажээ. Батлан хамгаалах, Сангийн, Эрүүл мэндийн, Эрчим хүчний, Дотоод хэргийн гэсэн 5 яамыг өөрийн сайдаар удирдуулахыг МАХН-МҮАН-ын эвсэл хүсч байгаа бололтой. Мөн Засгийн газар нэг шадар сайдтай байх бөгөөд тэр эрхэм нь Чүлтэмийн Улаан гэдэг нь бараг тодорхой болж байна. Энэ тохиолдолд АН-аас шадар сайдад дурдагдаж байсан зарим хүний нэрс автоматаар хасагдаж байгаа юм.
   Хамтарсан Засгийн газарт орж ажиллах хүсэлтээ албан ёсоор илэрхийлсэн ИЗНН-д нэг сайдын квот оногдох болсон гэж эх сурвалж мөн манайд мэдээллээ. Чухам аль яамыг ИЗНН-ын сайд толгойлох нь одоогоор тодорхойгүй байна. Харин зарим хэвлэлүүдийн таамаглаж байсанчлан бие даагчдын нэг нь сайд болно гэдэг мэдээлэл батлагдахгүй байгаагаас үзвэл үйл явдлын ийм өрнөл хэлэлцээрийн сэдэв биш нь тодорхой боллоо.
   Хэлэлцээрийн үр дүнг урьдчилан таамаглавал шадар сайд болон 4-5 яамны сайд МАХН-МҮАН-ын “Шударга ёс” эвсэлд, 1 яамны сайд ИЗНН-д, үлдсэн бүх яамд АН-ынханд оногдсон тун сонирхолтой эвслийн Засгийн газрыг 27 дахь ерөнхий сайд Норовын Алтанхуяг толгойлох болж байгаа юм. Харин хүчний ийм харьцаа бүхий танхим хэр урт настай болохыг ямар ч зүрхтэй ажиглагч одоогоор урьдчилан хэлж чадахгүй байна.  

24tsag.mn