Ерөнхийлөгч Ц.Элбэгдорж Английн Лондон хотод болох олимпийн наадмыг үзэхээр энэ сарын 26-нд буюу ирэх пүрэв гарагт явахаар болжээ. Тэрбээр хувийн зочиноороо Гандантэгчинлэн хийдийн хамба лам Д.Чойжамц болон хөдөлмөрийн баатар Х.Цагаанбаатар нарыг авч явахаар болоод байгаа юм. Тиймээс ерөнхийлөгчийг олимпийн наадам үзэхээр явахаас өмнө шинэ Засгийн газар, УИХ-ын ажлыг цэгцлэхээр яаравчилж эхэлжээ. Учир нь Засгийн газраа бүрдүүлэхдээ УИХ-ын сонгуулийн дүнг танилцуулсны дараа 45 хоногийн дотор ерөнхийлөгчтэй зөвшилцөн Засгийн газраа байгуулах ёстой байдаг аж. АН, Шударга ёс эвсэл, ИЗНН-ынхан одоогоор яамдын тохироогоо  хийж дуусаагүй байгаа ч долоо хоногийн дотор шинэ Засгийн газрыг байгуулах хэрэгтэй болоод байна.