Монголын нүдний эмч нарын нийгэмлэгийн судалгаагаар Ерөнхий боловсролын сургуульд суралцдаг 6-18 настай хүүхдүүдийн 15-20 хувь нь хараа муутай болохыг олж тогтоосон байна. Улаанбаатар хотод амьдардаг хүүхдүүдийн 20 хувь, Хөдөө орон нутагт амьдардаг хүүхдүүдийн 15 хувь нь сул хараатай болж холын хараа нь мууджээ.

Хүүхдүүдийн нүдний хараа муудаж байгаа нь хэд хэдэн шалтгаантай аж. Тодруулбал сүүлийн үед хүүхдүүд гадаа байгалийн гэрэлд гарч тоглохоо больсон. Ихэнх цагийг нарны гэрэл багатай орчин буюу гэртээ аль эсвэл тоглоомын газарт өнгөрөөдөг болсонтой холбоотой. Мөн ухаалаг утас, телевиз олон цагаар үзэх нь бага насны хүүхдүүдийн нүдний хараанд сөргөөр нөлөөлж байна гэдгийг ЭХЭМҮТ-ийн нүдний мэс заслын тасгийн эрхлэгч Ч.Цэнгэлмаа тодотголоо.

Хараа муутай 5 хүүхэд тутмын нэг нь харааны согогтой болж улмаар хараагүй болох магадлал өндөр байдаг байна. Тиймээс эцэг эхчүүд хүүхдийнхээ харааг жилд нэг удаа нүдний эмчид шалгуулж байхыг ЭМЯ-аас зөвлөж байгаа юм. Харин харааны шил зүүдэг хүүхэдтэй эцэг эхчүүд 6 сар тутамд нэг удаа нүдний эмчид хандах хэрэгтэй. Хүүхдийн нүдний харааг жил бүр шалгадаг болсноор болор цайх өвчин, нүдний хорт хавдар, нүдний хугарлын гажиг, хялар харах зэрэг өвчнийг эрт үед нь илрүүлж эмчлэх боломжийг олгодог. Хоёр метрийн цаана байгаа зүйлс нүдэнд бүрэлзэж харагдах нь харааны согогтой болсны шинж тэмдэг гэж үздэг аж.

Монгол улсад хараа муутай хүүхдийн тоо сүүлийн жилүүдэд тогтмол нэмэгдэж олон улсын дунджаас 1.5 дахин их болсон. Тиймээс сургууль, цэцэрлэгийн эмч, багш нарт хүүхдийн харааг шалгах анхан шатны мэдлэг олгож сул хараатай хүүхдүүдийг мэргэжлийн нүдний эмчид үзүүлэх чиглэлд нүдний мэргэшсэн эмч нартай хамтран ажиллуулах шаардлага бий болсон байна. Хараагүй болсноор хүний мэдээлэл авах чадвар 80 хувиар буурч, сурч боловсрох, ажил хөдөлмөр эрхлэх боломж хязгаарлагдмал болдог учир “Хүүхдийн харааг хамгаалах өдөр”-ийг 9-р сарын 15-нд орон даяар тэмдэглэн өнгөрүүлэхээр болсон байна.