Энэ сарын 16-19-ний өдрүүдэд бөмбөгтэй хоккейн ахмад тамирчдын Дэлхийн цомын тэмцээн /Bandy Old Boys World Cup/ Финлянд улсын Лаппинранта хотод зохион байгуулагдах гэж байгаа бөгөөд энэхүү тэмцээнд манай улсын ахмадын шигшээ баг анх удаа оролцох гэж байна. Энэхүү тэмцээнд ОХУ, Швед, Финлянд болон Эстони улсын нийт 10 баг оролцох юм.
Монголын бөмбөгтэй хоккейн холбоо нь 2002 онд байгуулагдаж, 2003 онд Олон улсын бөмбөгтэй хоккейн холбооны гишүүнээр элссэн. 2006 оноос хойш манай улсын бөмбөгтэй хоккейн шигшээ баг ДАШТ-ний Б хэсэгт тоглож байгаа бөгөөд энэ оны 1-сард Швед улсад зохион байгуулагдсан ДАШТ-нд манай баг амжилттай оролцож хүрэл медаль авсан байна.
Бөмбөгтэй хоккейн спорт нь эрчимтэй хөгжиж байгаа өвлийн багийн спортын төрөл бөгөөд олимпийн төрөлд орох боломжтой юм. Олон улсын бөмбөгтэй хоккейн холбоо (FIB) нь 2022 өвлийн олимпийн үеэр бөмбөгтэй хоккейн танилцуулах тоглолт хийх талаар БНХАУ-ын олимпын хороотой ярилцаж байгаа.
