Ё.БААТАРБИЛЭГ: ШИЛНИЙ ЦААНААС ЧИХЭР ДОЛООЛГОСООР 2020 ОНЫ СОНГУУЛЬТАЙ ЗОЛГОХ ВИЙ

Чуулганы хуралдаанаар “Монгол Улсын эдийн засаг, нийгмийг 2017 онд хөгжүүлэх үндсэн чиглэл”-ийг хэлэлцэж байна. Хэлэлцэж буй асуудалтай холбогдуулан УИХ-ын гишүүд байр сууриа илэрхийллээ.

УИХ-ын гишүүн Ё.Баатарбилэг:

-Эдийн засгийн өсөлт иргэдийн амьдрал дээр бодит өсөлт болж байна уу гэдгээр л дүгнэвэл зүгээр байна. 2016-2020 оны Засгийн газрын мөрийн хөтөлбөрийн хэрэгжилт 50 хувьд хүрсэн, амжилттай хэрэгжиж байгаа салбарууд байхад зарим салбарт 10 хувьтай байгаа зүйл байна. Тэгэхээр нэгэнт зорилт, хариуцах эзэн, хугацаа тодорхой байгаа нөхцөлд цонхны шилний цаанаас  чихэр долоолгосоор 2020 оны сонгуультай золгочих вий дээ. Боловсрол, эрүүл мэнд, хөрөнгө оруулалтын асуудал маш удаашралтай байна. Цаашид энэ тал дээр анхаарч ажиллах, томоохон төслүүдээ хөдөлгөх, одоо хэрэгжээд явж байгаа ажлууд руугаа эрчимтэй орохгүй бол хагас жил орчим явлаа, энэ Засгийн газар. 20*100 хөтөлбөрийн хэрэгжилт ямар байна вэ.

Хүнс, хөдөө аж ахуйн сайд Батзориг:

-Аж ахуй нэгж иргэдээ дэмжиж байж бид эдийн засгаа тогтворжуулна. Тэгэхээр зээлийн хүүг нэг оронтой тоо руу оруулах нь маш чухал. Манай салбар бодлогын дэмжлэг, татаасгүйгээр явахад хэцүү. 2017 онд улаанбуудайн урамшуулал олгоход газар тариалангийн салбарын сэргэлт нэмэгдсэн. Яг үүнтэй адил манай салбарт тодорхой дэмжлэг хэрэгтэй. 21*100 хөтөлбөрийг ажил үргэлжилж байна. Аймаг орон нутгийн санаачилга маш чухал. Орон нутагт ажлын байр бий болох, хөдөө аж ахуйн бүтээгдэхүүний борлуулалт нэмэгдүүлэх зорилготой ажиллаж байна.

УИХ-ын гишүүд асуулт асууж, үг хэллээ. Үүгээр УИХ-ын үдээс өмнөх чуулганы хуралдаан өндөрлөчихлөө.

Т.АЮУРСАЙХАН: ЭДИЙН ЗАСАГ ӨССӨН Ч ИРГЭДЭД ХҮРТЭЭМЖГҮЙ БАЙНА

УИХ-ын чуулганы өнөөдөр /2018.05.04/-ийн хуралдаанаар Засгийн газраас өргөн барьсан “Монгол Улсын эдийн засаг, нийгмийг 2017 онд хөгжүүлэх үндсэн чиглэл”-ийн биелэлтийг хэлэлцэж байна. Хэлэлцэж буй асуудалтай холбогдуулан УИХ-ын гишүүд байр сууриа илэрхийллээ. Тухайлбал,

УИХ-ын гишүүн Т.Аюурсайхан:

-ДНБ-ний нэг хүнд оногдсон хэмжээ 3500 ам.доллар байна. Энэ бол эдийн засгийн нийт орлого л доо. Энэ нь иргэддээ хүртээмжгүй байсаар ирсэн. Тиймээс иргэддээ хүртээмжтэй болгохын тулд юу хийж, ажиллаж байна вэ. Мөн сүүлийн хоёр жилд төсвийн орлого давж биелэгдэж байна. Энэ мөнгийг харахад цалин, тэтгэврийг нэмэх бодит боломж харагдаад байна. Яагаад гэвэл сүүлийн хэдэн жил гадаад валютын өсөлтөөс болж төгрөг суларсан. Иргэдийн худалдан авах чадвар унасан ийм цаг үед цалин нэмэх ёстой. Тэр давсан орлого хаашаа орж байна вэ. Түүнээс гадна иргэдээс хадгаламжийн татвар авч байгаа нь буруу гэсэн шүүмжлэл ирж байна. Хүүхэд бүрт 20 мянган төгрөг өгнө гээд тэр мөнгөөр нь хадгаламж нээхэд түүнээс нь татвар аваад байна. Хадгаламжийн хүүгээс татвар авахыг болих уу. Засгийн газраас бодлого шийдвэр оруулж ирэхдээ шинжлэх ухааны үндэслэлтэй оруулж ирмээр байна.

Сангийн сайд Ч.Хүрэлбаатар:

-Бодлого боловсруулахдаа судалгаа, шинжилгээтэй хийх ёстой гэдэгтэй санал нэг байна. Тухайлбал, шатахууны үнийг нэмнэ, бууруулна гэхэд савлагаа үүсгэдэг. Нефть импортлогч компаниуд хүнд байдалд ордог. Тиймээс бид судалгаатай, бусад орны туршлагыг судалж бодлого боловсруулахаар бэлтгэж байна. Хадгаламжид байршуулсан орлоготой холбоотойгоор татвар авч байгаа нь хуулийн дагуу явж байгаа. Энэ татварын хувь хэмжээг өөрчлөхгүй гэсэн байр суурьтай байгаа. 2017 онд нэг хүнд ДНБ-ний хэмжээ 3660 ам.доллар болж байгаа. Эдийн засгийн өсөлт иргэдэд хүртээмжтэй орлого болоход тодорхой цаг хугацаа ордог. Эдийн засгийн зөв бодлогоос шалтгаалж ард иргэдэд бодит байдлаар хүрнэ.

УИХ-ын гишүүн М.Билэгт:

-2016 оны сонгуулиар бүрдсэн энэ УИХ, Засгийн газар тухайн үед хасах түвшинтэй, хүнд үеийг даван туулсан. 2017 онд өсөлт бий болсон байна. Гэхдээ иргэдээ ажилтай, цалин орлоготой болгоход цаашид ямар арга хэмжээ, бодлого хэрэгжүүлэх вэ. Хөдөлмөр эрхэлж буй иргэдийн 80 хувь нь хувийн хэвшилд ажиллаж байна. Татварын орлогын 80 хувийг хувийн аж ахуй нэгж хэрэгжүүлдэг. Тэгэхээр хувийн аж ахуй нэгжээ яаж дэмжиж, ажлын байраа хадгалах, нэмэгдүүлэх шаардлагатай вэ. Ажилгүй залуучуудын 40 хувь нь дипломтой боловсон хүчин байна.

Сангийн сайд Ч.Хүрэлбаатар:

-ДНБ-ний 80 хувийг бий болгож байгаа хувийн аж ахуй нэгжийг дэмжихийн тулд арилжааны банкны зээлийн хүүг бууруулах чиглэлээр тодорхой арга хэмжээ авахаар ажиллаж байна. Мөн татварын багц хуулийн төслийг УИХ-д удахгүй өргөн барина. Энэ хуульд аж ахуй нэгжид ирэх дарамтыг бууруулах заалтуудыг тусгаж байгаа. 2016 онд өрхийн хэрэглээ есөн хувиар буурсан байхад 2017 онд 4,3 хувиар өссөн нь эдийн засагт гарч байгаа нааштай үзүүлэлт юм. Мөн өрхийн орлого 944 мянга байсан бол 2017 онд нэг сая 35 мянган төгрөг болж өссөн.

2017 ОНЫ ҮНДСЭН ЧИГЛЭЛИЙГ ХЭЛЭЛЦЭЖ БАЙНА

УИХ-ын чуулганы өнөөдөр /2018.05.04/-ийн хуралдаанаар Засгийн газраас өргөн барьсан Монгол Улсын эдийн засаг, нийгмийг 2017 онд хөгжүүлэх үндсэн чиглэлийн биелэлтийг хэлэлцэж байна.

Нефтийн үйлдвэр болон төв цэвэрлэх байгууламжийн талаар ЗГХЭГ-ын дарга Г.Занданшатар чуулганы хуралдаанд мэдээлэл хийлээ. Тус үйлдвэрийг барих ТЭЗҮ-ийг хийсэн. ТЭЗҮ нь нь сайн гарсан. Энэтхэгийн гадаад харилцааны сайд Монголд айлчлах үеэр энэ асуудлыг хэлэлцсэн. Төв цэвэрлэх байгууламжийг барих ТЭЗҮ бэлэн болж байгаа. 

Тавантолгойг уурхайг дагасан дэд бүтцийн асуудал, авто замын тендер зарласан. Хариуцлагатай уул уурхайг хөгжүүлэхэд анхаарна. Мэдээлэлтэй холбогдуулан УИХ-ын гишүүд байр сууриа илэрхийлж байна.