Зуны халуунд алжаалаа хэрхэн тайлахаа та төлөвлөсөн үү. Тэгвэл залуусын хүсэн хүлээдэг Playtime амьд хөгжмийн Фестиваль өнөөдөр эхэлж байна.
Монголын хамгийн том амьд хөгжмийн наадам болох “РLAYTIME 2018” өнөөдрөөс 8-ныг хүртэл Гачууртын Монгол шилтгээнд зохион байгуулагдах юм.
Наадмыг хөгжөөх одод хэн бэ?
“Playtime 2018” наадамд оролцсоноор дэлхийд алдартай AНУ-ын "Ariel Pink", Япон улсын “The Fin.”, “Lite", Монголын домогт "Хөх Тэнгэр", анхны синт рок "Сөрөг Хүч", пост панк "The Colors" тэргүүтэй хөгжмийн олон урсгалын танил, шилдэг, шинэ залуу 35 хамтлаг, Электроник дэнс хѳгжмийн тайзнаа Италийн techno DJ Claudio PRC, Голландын Albert Van Abbe, Mонголын Biliguudei, TMK тэргүүтэй шилдэг 30 Ди-Жэй нийт 70 гаруй хамтлаг дуучин, уран бүтээлчид цэвэр агаарт 3 хоногийн турш “Playtime”, “Нааглихац”, "La Vie En Rose" гэсэн гурван тайзаар дамжуулан ѳѳрсдийн уран бүтээлээ хүргэх болно.
Наадамд хэрхэн очих вэ?
Та “Playtime 2018” наадамд хэрхэн очихоо мэдэхгүй л сууна уу? Тэгвэл “Playtime 2018” наадамд хувийн унаанаас гадна наадмын үзэгчдэд зориулсан үнэ төлбөргүй автобус та бүхэнд үйлчлэх болно. Наадмын автобус Хүүхдийн ордон – Монгол шилтгээний хооронд шөнийн 02:00 цаг хүртэл иргэдэд үйлчлэнэ. Мөн Гачуурт явах шугамын автобусаар очих боломжтой юм. Зурган дээр дарж автобусны чиглэлийг томоор харна уу.
“Playtime 2018” наадмын үеэр хаана байрлах боломжтой вэ?
Та наадмын турш өөрийн майхан эсвэл Монгол шилтгээний гэр, байранд байрлах боломжтой. Өөрийн майхантайгаа тоглолтын талбайн ойролцоо заагдсан газарт дэвсгэрт байрлах боломжтой юм. Харин Монгол шилтгээний гэр, байшинд орсон хүмүүс долдугаар сарын 7-ны 16:00 цагт орж долдугаар сарын 9-ны 22:00 цагт гарна. Монгол шилтгээний гэр, байшин нь дотроо 2 ор, 00, дүштэй юм байна.
Наадмын аюулгүй байдлыг хэрхэн хангах вэ?
“Наадмын үеэр хулгай, хэрүүл зодоон хийх, туулайчлах, согтууруулах ундаа нууцаар оруулах зэрэг зөрчил, гэмт хэргээс урьдчилан сэргийлэх, арилгах үүднээс мэргэжлийн хувийн харуул хамгаалалтын ажилтнууд болон Баянзүрх дүүргийн Гачууртын цагдаагийн алба хамтран ажиллана. Мөн эрүүл мэндийн анхан шатны тусламж үзүүлэх мэргэжлийн эмч ажиллаж байгаа. Наадмын шар айргийг шилээр бус зориулалтын нэг удаагийн пластмасан аяганд хийж үйлчилнэ, талбайд архи худалдаалахгүй” гэж зохион байгуулагч комисс мэдээллээ.
Наадмын үнэ тариф мэдээлэл
Р.Хишигжаргал
