Алдарт “Cosmopolitan” сэтгүүлийн экс ерөнхий эрхлэгч Хелен Гурлей Браун өчигдөр 90 насандаа таалал төгслөө. Тэрбээр өчигдөр Нью-Йоркийн эмнэлэгт өөд болсон байна. Олон улсад 64 салбартай тус сэтгүүлийг 1965-1997 онд удирдаж байсан аж. 2010 онд 60 орчим жил амьдарсан нөхөр Дэвид Браунаасаа хагацсан юм .
   Түүний 1962 онд гаргасан “Sex and the Single Girl” хэмээх ном тухайн үедээ шилдэг борлуулалттай номын жагсаалтад бичигдэж асар их амжилтыг авчирсан юм. Хелен Гурлей Брауныг 1965 онд “Cosmopolitan” сэтгүүлийн ерөнхий эрхлэгчээр ажиллаж эхлэхэд тус сэтгүүлийн нэр хүнд унаж байсаэ. Тэрбээр эмэгтэйчүүдэд хандсан мэдээ мэдээлэл, сонирхолтой нийтлэл бэлтгэх чиг хандлагыг бий болгосноор олон жилийн түүхтэй сэтгүүлийг олон улсад нэр хүндтэй болгоход чухал алхам хийжээ.Түүнийг космополитаны загалмайлсан эх ч гэж нэрлэдэг билээ.
   Экс ерөнхий эрхлэгчийн удирдлага дор 1980 он гэхэд “Cosmopolitan” 300 орчим хуудастай хэвлэгдэж, дэлхийн 100 орчим улсад 35 хэлээр хэвлэгдэх болсон байна. Хелен Гурлей Браун “Эмэгтэйчүүдийг эрэгтэй хүн ойлгоход 100 жил ч хангалтгүй. Тиймээс л эмэгтэйчүүдэд зориулсан сэтгүүлийг эрчүүд унших дуртай байдаг” гэжээ.