УИХ-ын чуулганы хуралдааны үеэр УИХ-ын гишүүн Т.Аюурсайхан "Оюутолгойн гэрээг хууль зөрчиж байгуулсан байна гэдгийг АТГ-аас шалгаад дүгнэлтээ хүргүүлсэн. 230 хуудас дүгнэлтээ нэр бүхий дөрвөн албан тушаалтанд хүргүүлсэн. Гэтэл   хэн нь ч энэ талаар дуугарахгүй байна. Би хөөцөлдөж байж хуулбарыг нь олж авлаа. Олшруулж УИХ-ын гишүүдэд тараана. Гишүүд мэдээлэлгүйгээсээ болж буруу шийдвэр гаргаж болно. Гэтэл зөв мэдээлэл авчихаад нэг талыг барих юм бол ашиг сонирхолын зөрчилтэй гэж дүгнэх боломжтой шүү. Шинжэчид энэ гэрээг шалгаад бүх зөрчлийг илрүүлсэн. Олон тэрбум төгрөгийн үнэтэй ордыг гаднынхан хууль бусаар авчихаж. Үүнээс болж Монгол Улсад нэн хохиролтой гэрээ байгуулах үндэс болсон байна. Үүнийг нь АТГ тогтоосон. Дүгнэлтээ холбогдох хүмүүст хүргүүлсэн байна. Гэтэл хаана, юу хийж байна... С.Баяр, С.Баярцогт, Ц.Элбэгдоржийн хэлсэн үгийг цаг хугацаа харуулсан. Тиймээс ийм байдлаар цааш явж болохгүй ээ" гэсэн юм.

Тэгвэл үүний хариуд Ерөнхий сайд асан С.Баяр өөрийн цахим хуудсаар дамжуулан "УИХ-ын энэ  гишүүний ярьж буйгаар надад үүсгэсэн эрүүгийн хэрэгт гаргасан дүгнэлт бололтой. Яллагдаж буй надад байхгүй, би үзээгүй хавтастай юм гаргаж чуулган дээр уншаад улстөрийн шоу хийгээд байх нь хачирхалтай. Яллаж буй юм бол шүүх дээр, Монгол Улсын хуулиар яллаасай билээ. Арай л дэндүү завхруулах юм даа..." гэсэн байна. Түүнчлэн "Өнөөдөр Монгол Улсын эдийн засаг сайнгүй байгаа. Хамгийн их татвар төлж байгаа байгууллага “Оюу толгой”. 40 жилийн өмнө байгуулсан “Эрдэнэт”, дөрвөн жилийн өмнө үйл ажиллагаагаа эхэлсэн “Оюу толгой” хоёр л өнөөдөр Монголын эдийн засгийг авч яваа байх.

Энэ мөнгөөрөө л бид тэтгэвэр тэтгэмж, цалингийн асуудлыг шийдэж байгаа. Үүнээс УИХ-ын гишүүн Ц.Даваасүрэн, Х.Болорчулуун нарын цалин тавигдаж байгаа болов уу гэж бодож байна" гэжээ.

Г.Алимаа