Манай улс 2014 оноос өмнө Дэлхийн эрүүл мэндийн байгууллагын стандартаар агаарын чанарын индексийг хэмждэг байжээ. Өөрөөр хэлбэл, агаарын чанарын индексийг 0-12 байвал хэвийн гэж үзэх бөгөөд үүнээс дээш гарвал бохирдолтой гэж үздэг байсан байгаа юм. Ийн тооцоолсон нь нэг талаасаа агаарын бохирдлыг маш нарийн төвшинд тодорхойлж, энэ хэрээрээ иргэдийн эрүүл мэндэд бодитоор ямархуу заналхийлэл учруулж буйг тооцох боломжтой байсан аж.

Гэтэл 2014 оноос хойш БНХАУ-ын стандартаар буюу агаарын чанарын индекс 0-36 байвал хэвийн гэж үзэхээр тооцоолол хийж эхэлжээ.

Ингэснээр агаарын бохирдлын хэмжээ буурсан мэт тоо гарч буйг үгүйсгэхгүй бөгөөд стандартыг ингэж өөрчилсөн нь агаарын чанарын индексийг нарийвчлан тооцоход хүндрэл учруулж байна гэдгийг судлаачид онцолсон хурал өнөөдөр боллоо. Тодруулбал Агаарын чанар, сайжруулсан түлшний хэрэглээний талаар уулзалт, хэлэлцүүлгээр дээрх асуудлыг эрдэмтэн, судлаачид хөндөхийн сацуу агаарын чанарын индексийг гурван цагийн дундажаар тооцоон гарах нь мөн л агаарын бохирдлын бодит үзүүлэлтийг тооцож гаргахад хүндрэлтэй байгааг сануулсан.

Энэ талаар судлаач М.Мандухай “Гадаад орчны бохирдол 1 нэгжээр нэмэгдэхэд дотоод орчны бохирдол 1.3 нэгжээр нэмэгдэж байна. Хүн амьдралынхаа 90 орчим хувийг гэр болон ажил, сургууль дээрээ өнгөрүүлдэг. Энэ утгаараа дотоод орчны агаарыг цэвэршүүлэх тал дээр анхаарах ёстой. Түүнчлэн агаарын чанарын индексид тооцоолол хийж үзсэн. Гэхдээ бохирдол буурсан гэж шууд хэлэх боломжгүй. Учир нь сайжруулан түлш хэрэглээд удаагүй байна. Нөгөөтэйгүүр, хүйтний эрч чангараагүй энэ үед агаарын бохирдол өмнөхөөсөө буурсан гэж хэлэх боломжгүй. Тиймээс магадгүй 3-4 сарын сарын агаарын чанарын индекс хэр өөрчлөгдсөн талаар хэлэх боломжтой” гэсэн юм.

Г.Нацаг