Хуульч Б.Гүнбилэг МАН-ын Хяналтын ерөнхий хороонд ханджээ. МАН-ын гишүүнийхээ хувиар. Шалтгаан нь Хууль зүй, дотоод хэргийн сайд Ц.Нямдорж, УИХ-ын Хууль зүйн байнгын хорооны дарга Х.Нямбаатар нарыг ирэх сонгуульд МАН-аас нэр дэвших ёсгүй гэж үзжээ. Үүнийгээ Ц.Нямдорж нь МАН-ын нэр хүндийг унагааж байгаа тул МАН-аас нэр дэвших ёс суртахууны эрхгүй, харин Х.Нямбаатар нь ЖДҮ-ээс авахад оролцсон хэмээн тайлбарласан байна.

Уг нь Б.Гүнбилэгийн аав Ж.Болдбаатар МАН /тухайн үеийн МАХН/-аас сонгогдсон гишүүн байхдаа УИХ-д 72 суудалтай Бүлгийн даргаар ажиллаж байсан нэгэн. Гэвч үнэмлэхүй олонхийн Бүлгийг зангидаж чадаагүй нь удаах сонгуульд нь 25 суудалтай болж ялагдах шалтгаан болсон байдаг. Өөрөө ч унасан.

Өдгөө аав Ж.Болдбаатарынх нь хамаатан УИХ-ын гишүүн Д.Дамба-Очир гэхэд парламентын нэр хүндийг хамгийн их унагааж буй гишүүний нэгээр тодроод буй.

Мэдээлэлд ойр байдлаа ашиглаж, хамаарал бүхий компаниараа зээл авахаас эхлээд Лүнгийн замыг там болгосон гээд Д.Дамба-Очир гишүүнийг тойрсон сөрөг мэдээлэл олон. Угтаа бол хуульч Б.Гүнбилэг үнэхээр ёс суртахууны тухай асуудлыг хөндөж байгаа бол эхлээд энэ бүгдийг ярих л ёстой.

МАН-ын Хяналтын ерөнхий хорооноос ямар шийдвэр гаргах нь цаг хугацааны асуудал ч, хуульч Б.Гүнбилэгийн энэ удаагийн үйлдлийг сонгууль угтсан улс төр гэж харах хүн олон байна.

Тэгж харах ч үндэслэлтэй. Ялангуяа сонгууль дөхсөн энэ үед. Тэгээд ч Б.Гүнбилэгт өмнө нь уг асуудлаар намынхаа Хяналтын ерөнхий хороонд өргөдлөө өгөх хангалттай хугацаа байсан уу гэвэл байсан. Шинэ залуу үеийн төлөөлөл гэх "Уухай" хөдөлгөөнд нэгдэж "Зөвхөн улс төр төдийгүй нийгмийн сэтгэлгээг ч шинэчилнэ" хэмээн ярьж, намынхаа хийж, хэрэгжүүлж байгаа бодлогыг сөрж явахдаа шүүмжлэх байлаа.

Тийм атал коронавирусний цар тахалтай холбогдуулан дор бүрнээ хариуцлагатай хандаж буй цаг үед гэнэт сэрсэн юм шиг намынхаа төв байр руу бичиг цаас барин гүйж эхэлснийг улс төр гэж харахаас өөр аргагүй. Ер нь сонгууль дөхөхөөр хэн нэгэн улстөрчийг онилж, шүүмжлэх замаар нийгэмд танигддаг нь манайд шинэ юм биш. Эртнээс тогтсон танил технологи. Өмнө нь ч байсан, одоо ч байсаар байна.

Тэрхүү арга барилыг хуульч Б.Гүнбилэг шүүрэн авсан нь энэ. Гэхдээ Б.Гүнбилэгийн улс төр хийж, нийгэмд танигдах гэж хийж байгаа үйлдэл нь анхных биш юм.

УИХ-ын дарга асан М.Энхболдтой нэр бүхий таван гишүүний хамт зарим ТББ-ын төлөөлөл уулзах үеэр хутгатай хүн дайрсан тухай нэвтрүүлэгт оролцох үеэрээ ярьсан нь хэсэгтээ шуугиан тарьж байв. Төрийн нэгдүгээр зэргийн хамгаалалттай хүний өрөөнд хутга авч орсон хүн бэ хэмээн хэвлэлүүд бичиж байлаа. Б.Гүнбилэг зөвлөхийн үгээр хэн хутга бариад УИХ-ын даргыг алах гэж дайрсан мэт ойлголтыг төрүүлж байсан юм. 

Гэвч УИХ-ын дарга асан М.Энхболд “Над руу ухасхийсэн хүний гарт хутга байгаагүй. Хамгаалалтын албаныхан хутга хураасан гэж надад танилцуулж байсан. Би тэр үед ордны доторх болон гаднах нөхцөл байдлыг сайн мэдэрч байсан тул энэ асуудлыг дэвэргэх шаардлагагүй гэж хэлсэн. Тухайн үед нь иргэд бухимдалтай байна, аргагүй биз ээ, амьдрал сайнгүй байна шүү дээ гэж хэлж байсан" хэмээн ахлах зөвлөхөөр ажиллаж байсан Б.Гүнбилэгийн ярьсныг үгүйсгэсэн байдаг.

Б.Гүнбилэг ч энэ асуудлаар дахин дуугараагүй, хууль хяналтын байгууллагаас хэн нэгнийг шалгаж, хариуцлага тооцоогүй юм. Нэг үгээр Б.Гүнбилэгийн ярьсан үг худлаа болж таарсан. Хуульч хүн тэрч бүү хэл хууль зүйн ухааны доктор хүн олон нийтэд буруу ташаа мэдээлэл өгч, худлаа яриад гүйгээд байгаа нь хуульч уу, худалч уу гэдгийг харуулж байна.

Г.Эрхэс