Испанийн шигшээтэй 0:0-ээр тэнцэж, хөлбөмбөгийн ДАШТ-ий хамгийн том сенсаацын нэгийг бүтээгээд буй Кабо-Верде улс нь Африкийн баруун эргээс алс Атлантын далайд орших жижиг арлын улс юм. Хэдийгээр хүн ам цөөн ч спорт, аялал жуулчлал, улс төрийн тогтвортой байдлаараа Африкт онцгой байр суурь эзэлдэг.
- Албан ёсны нэр: Бүгд Найрамдах Кабо-Верде Улс
- Нийслэл: Praia
- Хүн ам: ойролцоогоор 490-600 мянга
- Газар нутаг: 4,033 км²
- Албан ёсны хэл: Португал хэл
- Үндэсний хэл: Кабо-Вердийн креол хэл
- Валют: Кабо-Вердийн эскудо
- Тивийн харьяалал: Африк
- Байршил: Сенегалын эргээс баруун тийш 620 орчим км зайтай Атлантын далайд оршино.
"Кабо-Верде" гэдэг нь португал хэлээр "Ногоон хошуу" гэсэн утгатай. Энэ нэр нь Африкийн хамгийн баруун цэг болох Сенегал дахь Кап-Вер "Cape Verde Peninsula"-ээс гаралтай юм.
Гарал үүсэл, түүх
Кабо-Вердийн арлууд XV зууны дунд үе хүртэл хүн амгүй байжээ. 1460 онд Португалын далайчид арлуудыг нээж, суурьшил байгуулсан нь халуун бүсэд үүссэн Европын анхны колониудын нэг болсон байна. Дараа нь Баруун Африкаас авчирсан боолууд болон Португал суурьшигчдын нөлөөгөөр өнөөгийн Кабо-Вердийн үндэстэн бүрэлдэн тогтжээ. Иймээс тус улсын соёл нь Африк болон Европын соёлын хослол гэгддэг.
Кабо-Верде 1975 оны долдугаар сарын 5-нд Португалаас тусгаар тогтнолоо зарласан байна. Тус улс нь 10 том галт уулын гаралтай арлаас бүрддэг. Хамгийн алдартай нь "Pico do Fogo" бөгөөд 2829 метр өндөртэй идэвхтэй галт уул юм. Энэ нь тус улсын хамгийн өндөр цэгт тооцогддог.
Сонирхолтой баримтууд
1. ДАШТ-д шалгарсан хамгийн жижиг улсуудын нэг
Кабо-Верде ердөө хагас сая гаруй хүн амтай мөртлөө 2026 оны ДАШТ-д анх удаа шалгарсан бөгөөд тэмцээнд оролцсон хамгийн жижиг хүн амтай улсуудын нэг болж түүхэнд бичигдсэн.
2. Диаспора нь эх орныхоо хүн амаас олон
Кабо-Вердийн гаралтай хүмүүс Португал, Франц, Нидерланд, АНУ зэрэг оронд олноор амьдардаг бөгөөд гадаадад амьдарч буй иргэдийн тоо эх орондоо байгаа хүн амаасаа ч олон байдаг ажээ.
3. Африкийн хамгийн тогтвортой ардчиллуудын нэг
Тус улс Африкт ардчилал, хэвлэлийн эрх чөлөө, авлигын эсрэг үзүүлэлтээр тогтмол дээгүүр эрэмбэлэгддэг.
4. Аялал жуулчлалын диваажин
Цагаан элсэн наран шарлагын газар, Атлантын далайн үзэсгэлэнт эрэг, галт уулын тогтоц нь жил бүр олон зуун мянган жуулчин татдаг. Аялал жуулчлал нь тус улсын эдийн засгийг голлон бүрдүүлж байна.
Хөлбөмбөгийн гайхамшиг
"Цэнхэр акулууд" хочтой Кабо-Вердийн шигшээ баг олон жилийн турш Африкийн дундаж багт тооцогдож байсан ч сүүлийн арван жилд эрчимтэй хөгжжээ. Багийн ихэнх тоглогч Португал, Франц, Нидерланд зэрэг оронд төрж өссөн Кабо-Вердийн гаралтай тамирчид байдаг ажээ. Испанитай тэнцсэнээр ердөө хагас сая хүн амтай энэ жижиг арлын улс ДАШТ-ий тайзнаа өөрсдийн нэрийг хүчтэйгээр таниулж, дэлхийн хөлбөмбөгийн шинэ үлгэрийг бичлээ.
Л.Баяр
Сэтгэгдэл (1)