Кембрижийн хөтөлбөртэй холбоотой асуудлын талаар УИХ-ын гишүүн Х.Ганхуягаас тодрууллаа.

-Боловсролын багц хуулийн шинэчлэлийн талаар хэлэлцүүлэг өрнөж байгаа. Ирэх намрын чуулганаар хэлэлцэгдэх асуудалд багтаж чадах болов уу?

-Боловсролын багц хуулийг намрын чуулганаар хэлэлцэж амжихгүй байх гэж бодож байна. Учир нь намрын чуулганаар хэлэлцэгдэхээр хүлээгдэж байгаа хуулийн төсөл их бий.

-Гишүүд Кембрижийн хөтөлбөрийг улсын сургуулиудад нэвтрүүлэх, одоо байгаа тогтолцоогоо сайжруулах хэрэгтэй гэсэн хоёр байр суурьтай байна лээ. Та Кембрижийн хөтөлбөрийг дэмждэг хүний нэг. Яагаад?

-Кембрижийн хөтөлбөр ярихаар хамгийн их эсэргүүцэлтэй тулгарч байна. Эцэг эх, сурагчид ч биш  дийлэнх нь хувийн сургуулиуд эсэргүүцсэн байр суурьтай байна. Төр боловсрол олгож байгаа бол тэгш байх зарчим барих ёстой. Миний хүүхэд ч таны хүүхэд ч яг ижилхэн боловсрол эзэмших ёстой шүү дээ. Түүнээс биш Их Хурлын гишүүний хүүхэд илүү боловсрол эзэмших ёстой гэсэн үг биш. Хэрэв хувийн сургууль олон улсын боловсрол олгож байгаа бол улсын сургууль ч яг адил олгодог байх зарчим баримтлах нь зөв. Хэрэв улсын сургууль олон улсын боловсрол олгохгүй байя гэвэл хувийн сургууль я ялгаагүй олгохгүй байх зарчим баримтлах хэрэгтэй.

Кембрижийн хөтөлбөр гэхээрээ нэгдүгээр ангиасаа англи хэл үзэж эхэлнэ гэсэн үг биш. Зургаа болон есдүгээр ангиасаа англи хэл үзэж болдог. Ингэхдээ шинжлэх ухааны хичээлүүдээ л гадаад хэлээр үздэг. Энд монголын хэл соёл устана гэсэн зүйл байхгүй. Бусад нь хичээлүүд нь бүгд эх хэлээрээ ордог.

-Кембрижийн хөтөлбөртэй гурван сургуульд энгийн сургуулиас ахиу зардал төсөвлөдөг гэсэн. Зардал нь өндөр байх юм биш үү?

-Тэр худлаа. Тухайлбал, “Шинэ эрин” сургуулийн байр хоёр тэрбум төгрөгөөр боссон. Хичээлийн сургалтад шаардлагатай лаборатори зэрэг нь нэг тэрбум төгрөг. Нийт гурван тэрбум төгрөгөөр баригдсан сургууль юм. Гэтэл энгийн сургууль 5-8 тэрбумаар баригдаж байна. Олон улсын хөтөлбөртэй сургуульд жил бүр мөнгө төлдөг гэдэг асуудал мөн яригддаг. Энэ ч ташаа мэдээлэл.  Анхан шатанд л мөнгө төлдөг. Түүнээс хойш сурагч шалгалтаа өгөх бүрт нь үнэгүй сунгагдаад явдаг. Мөн төгсөхдөө элсэлтийн ерөнхий шалгалт уу эсвэл гадагшаа сургуульд явах бол энэ чиглэлээр шалгалт өгөх үү гэдгээ өөрөө сонгодог. Гадаад улсад сурахаар өгч байгаа шалгалт нь төлбөртэй. Кембрижийн хөтөлбөртэй сургууль төгссөн сурагч гадагш сурах байдлаар шалгалт өгөөд өөрийгөө шалгалт өгсөн дэлхийн бусад хүүхдээс аль зэрэгт явж байгаагаа мэдэх боломжтой. Үүгээр давхар багшийн ур чадвар дүгнэгдэх үг. Мөн нэг давуу тал нь шалгалт өгсөн хүүхэд дэлхийн аль ч сургуульд дахин шалгалт өгөхгүйгээр шууд орох боломжтой.

-Кембрижийн хөтөлбөр хэрэгжиж эхэлвэл бүх сургуулийг ийм системээр хичээлийн үйл ажиллагааг нь явуулах юм уу эсвэл хэсэгчлэх юм уу?

-Эхний ээлжинд бүх аймаг, дүүрэгт 1-2 сургууль байгуулахаар зорьж байна. Дүүргүүдэд байгуулагдлаа гэхэд хүүхдээ төв рүү зөөх шаардлагагүй болно шүү дээ.

-Эхний ээлжинд дүүрэг, аймаг бүрт нэг сургуулийг Кембрижийн хөтөлбөрт шилжүүлнэ гэвэл та бүгдийн яриад байгаатай ялгаагүй хүүхдүүдээ алагчилж байгаа хэрэг болох юм биш үү?

-50 сургууль бий боллоо гэхэд нэг сургуульд 40 багш бэлдэх шаардлагатай болно. Багш бэлдэхэд л хугацаа орж байгаа юм. Энэ бол зөвхөн эхий алхам. Манай улсад шинжлэн ухааны хичээлийн хоцрогдол их байна шүү дээ. Бодит үнэнг хүлээн зөвшөөрөхөөс өөр аргагүй. Улсын суогуулийн нийт 10 хувьд нь нэвтрүүлчихээр ялгаварлалаа гээд байдаг. Тийм биш.

Манай улсад хувийн 150 гаруй сургууль бий. Үүнээс 140 гаруй нь олон улсын улсын хөтөлбөртэй. Хувийн сургуулиудад боломжтой айлын хүүхдүүд л сурдаг. Тэгвэл яагаад Гандан, Баянхошууны хүүхдүүд олон улсын боловсрол эзэмшиж болохгүй гэж. Төр тэр сайн боловсролыг нь олгох ёстой.

Б.Лхам