ХӨСҮТ-ийн тархвар судлаач Э.Тэмүүлэн "Арваннэгдүгээр сарын 10-нд дотоодын халдварын анхны тохиолдол бүртгэгдсэнээс хойш арваннэгдүгээр сарын 19, 20 хүртэл халдварын тоо өдөр тутам нэмэгдэж байгаад түүнээс хойш буурч байна. Энэ нь Засгийн газар хурдтай арга хэмжээ авч, дотоодын халдвар бүртгэгдсэний маргаашаас л бүрэн хөл хорио тогтоосны үр дүн байж магадгүй. Дотоодын халдвар бүртгэгдээд дөнгөж хоёр долоо хонож байгаа учраас хараахан баталгаатай мэдээлэл хэлэх боломжгүй байна.

Тархвар судлаачдын хувьд тархварын муруйг цаг тутам шинэчилж, голомт тус бүрээр нь хараад хаана хүчээ төвлөрүүлэх ёстой, хаана хүний нөөц дутагдалтай байна гэдгийг судалдаг. Сэлэнгэ аймагт өргөн халдварын голомттой байна. 

Халдварын нууц үе 5-7 хоног үргэлжилж байгаа бөгөөд бусад орны судалгаанаас харвал халдвар авсан хүмүүсийн 97 хувьд нь халдварын нууц үе 2-14 хоног байна. Тэгэхээр нэг нууц үеийн хугацаа дууссан байна. Хоёрдогч халдвар авсан өвчтөнүүд тэднээс халдвар авсан хүмүүсийн халдвар илрэх хугацаа хараахан болоогүй байгаа учраас хөл хорио болон бусад арга хэмжээ хэр үр дүнтэй байгааг дүгнэхэд эрт байна. Арваннэгдүгээр сарын 20-нд хамгийн их тохиолдол бүртгэгдсэн нь доорх хүснэгтээс харагдана. Засгийн газраас яаралтай арга хэмжээ авсны үр дүнд тархалт бага байгаа.

Халдварыг тархаахгүйн тулд аль ч улсад авч хэрэгжүүлсэн ямар ч арга хэмжээ 100 хувь үр дүнтэй байх боломжгүй. Энэ нөхцөлд Засгийн газрын зүгээс хил хаах, хөл хорио тогтоох, тусгаарлалт хавьтал илрүүлэлтийг зохион байгуулж байгаа бол иргэд амны хаалт зүүх, зай барих, агааржуулалт хийх гэх мэт арга хэмжээг авч хэрэгжүүлж чадвал халдварын эрсдэлийг бууруулж, вирус иргэдэд хүрэх замыг хааж чадна" гэлээ.

Б.Бат