Сүүлийн жилүүдэд техник технологийн хурдацтай дэвшлийн ачаар И-Спорт гэх спортын нэгэн шинэ төрөл үүсэн хөгжиж тус спортын төрлүүд нь өдгөө дэлхийн хамгийн их үзэгчтэй спортуудын эгнээнд зүй ёсоор багтдаг болсон билээ. Тэгвэл И-Спортын хамгийн том төлөөллүүдийн нэг болох “PUBG Mobile” тоглоомын дэлхийн аварга шалгаруулах тэмцээн Арабын Нэгдсэн Эмират улсын нийслэл Абу Даби хотод энэ сарын 21-27 өдрүүдийн хооронд дөрвөн өдрийн турш зохион байгуулагдаж байна.

Манай улсын “ZEUS ESPORT” багийн хувьд Abely, Zyoll, Godless, ICY гэх 4 тамирчдын бүрэлдэхүүнтэйгээр дэлхийн өнцөг булан бүрээс шалгаран ирсэн шилдэг 16 багийн нэгээр шалгаран тус тэмцээнд амжилттай оролцож байна.

Шагналын сан маш өндөртэй тэмцээн бөгөөд түрүүлсэн тохиолдолд 700000 USD, 2-р байр 200000 USD, 3-р байр 100000 USD, тэмцээний үнэ цэнтэй тоглогч 15000 USD гэх мэт оролцож буй 16 баг бүгд их бага хэмжээгээр мөнгөн шагнал хүртэх юм.

Тэмцээний эхний өдөр 6 тоглолтын дараа 31 оноотойгоор 14-р байранд, 2 дахь өдөр 13 тоглолтын дараагаар 93 оноотой 8-р байранд тус тус жагсаж байсан бол тэмцээний 3 дахь өдөр гайхалтай тоглолтуудыг үзүүлснээр 21 тоглолтын дараах байдлаар 277 оноотойгоор тус тэмцээнийг дэлхийн чансааг тэргүүлэгч БНХУ-ын “4 Angry Men” багийн хамтаар тэргүүлж байна. Тэгвэл тэмцээний сүүлийн өдрийн шийдвэрлэх 8 тоглолт өнөөдөр буюу 1-р сарын 26-ны өдөр  манай улсын цагаар 18:25 минутаас эхэлнэ.

Тамирчдыг ижил нөхцөлд өрсөлдүүлэхийн тулд бүх тамирчид OnePlus 8T утсаар тоглож байгаа бөгөөд нийт 3 тамирчнаас коронавирус илэрсэн тул тоглогчдын эрүүл мэндийн төлөө “Coca Cola” ордонд тоглогчид ирэлгүйгээр тусгаарлалтаас тэмцээндээ оролцож байна.

Эцэст нь ZEUS ESPORT багтай холбоотой баримтуудыг хүргэхэд:

Анх 2018 онд байгуулагдаж байсан.

Wildcard буюу хамгийн зэрэглэл муу бүсийн шилдэг 6 багийн нэгээр шалгарч зүүн өмнөд Азийн бүсийн аварга болж дэлхийн шилдэг 24 багийн өрсөлдөөнд орж улмаар дахин өрсөлдөж  ДАШТ-нд оролцох эрхээ авсан.

Тэмцээний туршид ZEUS ESPORT багийн тоглогч Zyoll өрсөлдөгч багийн нийт 39 тоглогчдыг устгасан гэх үзүүлэлтээрээ 3-р байранд жагсаж байна.

Тэмцээний туршид багаараа хамгийн олон тоглогчдыг устгасан. (117)

Тэмцээний туршид өрсөлдөгч багийн тоглогчиддоо хамгийн их гэмтэл учруулсан. (25312)

Багийн гишүүн Zyoll тэмцээний 3 дахь өдрийн үнэ цэнтэй тоглогчоор шалгарсан.

3 дахь өдрийн 18 дахь тоглолтод хожиж тэмцээний анхны хожлоо авсан.

Дэлхийн чансаанд одоогоор 12-р байранд бичигдэж байгаа.