Боловсролын сайдын гаргасан тушаалаас үүдэлтэйгээр ерөнхий боловсролын сургуулиудын захирал, багш нар, цаашлаад эцэг, эхчүүд ихээхэн бухимдаж, энэхүү шийдвэрээ эргэн харахыг салбарынхаа сайдаас шаардаж эхэлсэн. Үүний нэг болох .... дугаар сургуулийн захирал чин үнэнийг ийнхүү өчжээ.
“Долоохүй бол гашууныг нь мэдэхгүй, доголохгүй бол зовлонг нь ойлгохгүй гэдэг. Боловсрол, шинжлэх ухааны сайдын 2021 оны гуравдугаар сарын 19-ний А/97 тоот тушаал нь үндэслэл судалгаа, тооцоогүй, цаг үеийнхээ бодит нөхцөл байдлыг ойлгож мэдрээгүй, дэндүү амьдралаас тасархай хөнгөн хуумгай шийдвэр болсныг Монголын олон зуун багш нар шүүмжилж, бас эсэргүүцэж байна.
Бодлогынхоо яаманд тус нэмэр болох үүрэгтэй Боловсролын институт юугаа хийж, учиргүй их тайлан судалгаа нэхэж аваад байсан дүүргийн Боловсролын газар, нийслэлийн Боловсролын газрын удирдлагууд яагаад дуугүй байна вэ.
Анхан шатны нэгж дээр ажиллаж байгаа захирлын хувьд багш , сурагчид минь ядарч сульдаж байгааг зүгээр нэг хараад сууж чадахгүй нь. Энэ тушаал шийдвэрээ эргэж нэг хараач гэж хэлж, шаардахаас өөр арга алга. Иймээс дараах үндэслэлийг харгалзан үзэж гаргасан тушаал, шийдвэрээ эргэн харна уу. Үүнд.
- Өнөөдөр явж буй теле хичэлүүдийн чанар үр өгөөж, тааруу, суралцагсдын сонирхол хэрэгцээг нь хангаж чадахгүй, амьд харилцаа үүсгэсэн орчин үгүй, мэдээний нэвтрүүлэгч шиг багштай учраас сурагч төдийгүй эцэг, эхчүүд ч төвөгшөөж, бас залхах боллоо. Нэгэнт ойлгомж муутай халдууртсан ээлж өнгөрөөсөн теле хичээлүүд эцэстээ хүүхдүүдийн сурах сонирхлыг үгүй хийж, цээрлүүлж байна. Ийм хүндрэлийг ойлгосон санаачилгатай олон сургууль, багш нар лайв хичээлийг давхар зохион байгуулж, цаг наргүй ачаалал ихтэй ажилласаар байна.
- Цахим сургалтын явцад багш нарын хичээлийн бэлтгэл хангах, үндсэн сургалтын үр өгөөжийг бодолцон хоёр группээр хуваан хичээлүүлэх, хүүхдүүдийнхээ даалгаврын гүйцэтгэлийг хянах, зарим үед давтлага хийх, эцэг, эхтэй харилцан зөвлөлдөх, мэдээ тайлан гаргах гээд өдөртөө 10-14 цагийг гэрийн хүндрэлтэй орчинд тогтмол ажиллаж байна. Амралтын өдрүүдэд ч гэсэн хичээлийн бэлтгэлээ хангаад сууж байна. Боловсролын салбарын дийлэнх нь эмэгтэйчүүд. Тэд ар гэртэй, үр хүүхдүүдтэй. Бусдын л адил айлын эзэгтэйн үүргээ нуруундаа давхар үүрч явна.
- Гэр орноосоо гарахгүй хөл хорионд байгаа хүүхэд, том хүнгүй бүгд л сэтгэлийн айдас түгшүүр дунд, санаа сэтгэлийн дарамтад байгаа. Тэд гэрэл гэгээтэй мэдээлэл сонсогдохгүй, нийгмийн хязгаарлагдмал орчинд өдөржингөө телевиз, компьютер шагайж, мэдрэлийн ядаргаанд ч орж байгаа. Хамгийн чухал дээдлүүлштэй зүйл бол хүний эрүүл мэнд шүү. Тэд амрах эрхээ эдэлж, эрүүл байх шаардлагатай.
- Хичээлийн жилийн бүтцийг дуртай нэг нь зоргоороо өөрчилж, хувиргаж болохгүй. Энэ чинь улс үндэстний соёл, зан заншил, уламжлал, байгаль, цаг уур бүсчлэлийн онцлог, олон улсын хандлага шинэчлэлтэй уялдуулж, судалгаа туршилтаас үүдэлтэйгээр хийдэг зүйл. Хэн дуртай нь өөрчилмөөргүй байна. Дэлхийд хамгийн бага дундаж хоногоор (165) хичээллэдэг, судлагдахуун хичээлийнхээ тоогоор манлайлдаг, гэрийн даалгаврын долоо хоногт гүйцээх ачааллаараа тэргүүлдэг зэрэг шалтгаанаас улбаалан багш нар нь хичээлийнхээ агуулгыг бөөндөнө, хялбарчилна. Багтахгүй юм чинь шавь нартаа гэрийн даалгавар болгож хэмжээг ихэсгэж өгнө. Иймээс юун сургалтын чанар, хүртээмж ярих, шаардах. Энэ чинь хий хоосон зүйл болж хувирна. Богино цаг хугацаа, агуулгын их ачаалал дунд багш нар нь юун заах аргаа төгөлдөржүүлж өрийгөө хөгжүүлэх эцэстээ хамгийн их боловсролын дарамт бүхий улс Монгол болж байна. Би баримттай зүйлийг хэлье. Та бүхэн OECD education-аас ороод тайлантай нь жишээг харж болно.
Энэ асуудалтай холбоотой хамгийн энгийн үндэслэл хүчин зүйлийг дурдаж болно. Эдгээрийг харгалзан үзэж, Улаанбаатар хотын дунд сургуулиудын багш, сурагчдыг тав хоног ч болов амрааж өгөөч. Багш сурагчид минь ядарч, туйлдаж, залхаж байна. Сайд аа! Гэжээ.
Сэтгэгдэл (29)