АНУ-ын Хүнс, эмийн агентлаг эрүүл мэндийн байгууллагуудад хандан “Johnson & Johnson” компанийн үйлдвэрлэсэн вакцины хэрэглээг яаралтай зогсоохыг уриалсан талаар ВВС агентлаг мэдээллээ. Агентлагаас гаргасан мэдэгдэлд дурдсанаар бол, уг вакциныг хийлгэсэн хүмүүсийн дунд нэн ховор цус бүлэгнэх өвчин илэрч байгаа нь ажиглагдсан байна. Тодруулбал, “Johnson & Johnson”-ы вакцин тариулсан 6.8 сая хүнд ийм өвчний зургаан тохиолдол бүртгэгдсэн нь болгоомжлох шалтгаан мөн гэж агентлаг үзсэн байна.
Энэ дагуу “Johnson & Johnson” компаниас мэдэгдэл гаргаж, Европт хийх нийлүүлэлтээ хойшлуулснаа зарлалаа.
“Астра Зенека”-гийн вакцинд үүсч байсантай ижил тохиолдол ийнхүү “Johnson & Johnson”-ы вакцинд давтагдлаа.
“Johnson & Johnson”-ы вакцины хувьд АНУ-ын Хүнс, эмийн агентлаг өнгөрсөн хоёрдугаар сарын 27-ны өдөр яаралтай журмаар бүртгэж хэрэглээнд нэвтрүүлэх зөвшөөрөл олгосон байдаг. Энэ вакцин нь нэг тун тариад дархлаа тогтоодог, хадгалах тээвэрлэх хэм нь боломжийн зэрэг үзүүлэлтээрээ давуу ч хэрээглээ нь “Pfizer-BioNTech”, “Moderna”-гаас харьцангуй хязгаарлагдмал байсан юм.
