Эрүүл мэндийн яамнаас хөл хориог 7-14 хоног сунгах саналыг гаргаж, Улсын Онцгой комисс ч дэмжээд буй. Тиймээс  Засгийн газар өнөөдөр ээлжит бусаар хуралдан  тус саналыг  эцэслэн  шийдвэрлэх юм. Энэ хугацаанд иргэдээ бүрэн дархлаажуулна хэмээн тооцож буй.

ЭМЯ-ны зүгээс хатуу хөл хорионы дэглэмийг үргэлжлүүлэх бодлого барьж байгаа. Учир нь, өдөрт илрэх халдварын тохиолдлын тоо огтхон ч буурахгүйгээс гадна нас баралт ч нэмэгдсээр байгаа учраас тэр юм.  Цаашлаад МУИС-ийн багш, судлаач, доктор Т.Бэгзсүрэн “Сүүлийн өдрүүдэд халдварын тохиолдлын тоо нэмэгдэж байгаа нь өмнө нь хөл хориогүй үед халдварын нууц үедээ байсан хүмүүс. Тэд эмнэлэгт хандсан, PCR шинжилгээ өгч, онош нь батлагдаж байгаа юм. Энэ хугацаанд дунджаар 7-14 хоног зарцуулж байна. Бүх нийтийн бэлэн байдлын зэрэгт шилжсэн ч “Covid-19”-ийн тохиолдол өндөр гарч байгаа юм биш. Ханиад, томуу 2-3 хоногт шинж тэмдэг илэрдэг бол “Сovid-19”-ийнх долоо хоног, цаашлаад 14 хоногийн дараа ч илэрч болно. Энэ удаагийн хөл хорио бол амин чухал шийдвэр болсон. Учир нь дөрөвдүгээр сарын 5-ны тооцооллоос бодит байдал дээр халдварын тархалтын эрчим арай өндөр байна" гэлээ. Тиймээс өнөөдрийн Засгийн газрын хуралдаанаар энэхүү асуудлыг эцэслэн шийдэх ба иргэд ч тэр нь дээр. Гэхдээ дахиж мөнгө өгөх үү гэдэг асуултыг сөргүүлэн тавиад байгаа.

Монгол Улсын Засгийн газар иргэдийнхээ эрүүл мэнд үү, аж ахуйн нэгж байгууллагуудын сөхрөлт  уналт уу,  эдийн засаг уу гэсэн олон сонголтын өмнө ирээд байна.

У.Тэргэл