Ерөнхий сайд Л.Оюун-Эрдэнэ, БШУ-ны сайд Л.Энх-Амгалан, НЗД Д.Сумъяабазар нар “Нарны үрс” цэцэрлэгийн үйл ажиллагаатай танилцлаа. Энэ үеэр Ерөнхий сайд Л.Оюун-Эрдэнэ мэдээлэл өглөө.

Тэрбээр "Эрхэм эцэг эхчүүд, эрдэмтэн багш нар, оюутан сурагчдадаа хичээлийн шинэ жилийн мэнд хүргэе. Энэ жил 101 дэх хичээлийн жил. Шинэ зууны анхны хичээлийн шинэ жил гэж ойлгож болно. Өнгөрсөн жил сургууль цэцэрлэгээ хэрхэн оруулах вэ гэх амаргүй сорилттой нүүр тулж байсан. Энэ жилийн хувьд нэг том онцлог бий. Энэ бол сүүлийн үед, нэлээдгүй урт хугацаанд сугалаагаар ЕБС болон цэцэрлэгт ордог тогтолцооны гажуудалтай болчихсон байсан.

Энэ асуудлыг бүхэлд нь шийдье гээд улсын төсөв 100 тэрбум, нийслэлийн төсвөөс 100 тэрбум төгрөгийг шийдэж, дөрвөн сарын хугацаанд маш том ажил боллоо. Одоо бол сугалаагаар биш цахим бүртгэлээр явагдаж байгаа. Мөн давхар системийн бүртгэл байхгүй. Тиймээс ар өврийн хаалга гэж байхгүй.

Асуудал өөрөө шийдлээ олохдоо цогт байхыг шаардаж байна. Цаашид сайжруулах зүйлс байгаа. Энэ шийдэлд хувийн хэвшлийн оролцоо маш чухал байгаа. Цаашид төр заавал цэцэрлэг, сургууль барих шаардлагатай биш. Харин цэцэрлэгийн хүртээмж чанараа дээшлүүлэх шаардлагатай. Заавал барилга барих биш барьсан байшинг түрээсэлж болно. Энэ жил цахим гарын үсэггүй байна. Ирэх жил гарын үсэгтэй болно.Гарын үсэгтэй болсноор одоо хийгдэж буй цахим өгөгдөл илүү тодорхой болно. Өөрөөр хэлбэл, их өргөдөл дээр тулгуурлаад дүгнэлт хийх боломжтой.

200 тэрбум төгрөг нэг дор тавигдана гэдэг бол боломжгүй зүйл байж ирсэн. Боловсролын салбар дээр 20-30 орчим тэрбум төгрөг тавигддаг. 10 жилийн хугацаанд тавигддаг дүнг нэг жил дотор тавьж чадсан нь шийдэл юм. Цаашид асуудлаа эрэмбэлэх хэрэгтэй.

Дараагийн алхам бол хот хөдөөгийн боловсролын чанарын ялгааг байхгүй болгоно. Сайн багш хөдөө орон нутагт очиж ажиллавал ипотекийн зээлээс авхуулаад дэмжлэгийн багц гаргаж өгнө. Шинэ зууны эхний жилийн шинэ жилд Монгол Улс цэцэрлэгийн сугалааны тогтолцооноос салж чадлаа. Энэ бол маш чухал зүйл юм” гэв.

Д.Батчулуун