“Нийгмийн эрүүл мэндийн ноцтой байдлын үед сүрьеэгийн тусламж, үйлчилгээнд салбар хоорондын хамтын ажиллагааг бэхжүүлэх нь” сэдэвт чуулга уулзалтын талаар мэдээлэл өгч байна. Энэ үеэр ЭМЯ-ны Нийтийн эрүүл мэндийн газрын дарга Д.Баярболд мэдээлэл өглөө.

Тэрбээр "Нийгмийн эрүүл мэндийн ноцтой байдлын үед сүрьеэгийн тусламж, үйлчилгээнд салбар хоорондын хамтын ажиллагааг бэхжүүлэх нь” сэдэвт чуулга уулзалт маргааш Улаанбаатар хотод зохион байгуулахаар бэлтгэл ажлыг хангаад байна. Уг чуулга уулзалтад аймаг орон нутгийн удирдлагууд болон ДОХ, сүрьеэ өвчтэй тэмцэх глобал сангийн нийгэмлэг, олон улсын байгууллагууд, эрдэмтэд оролцоно. Мөн гаднын улсын төлөөллүүд оролцох юм.

Сүрьеэ өвчин нийгмийн эрүүл мэндийн дэлхийн асуудал хэвээр байна. Дэлхийн хүн амын нас барах арван шалтгааны нэг болсон. Мөн манай улс Сүрьеэгийн тархалт өндөртэй улс орны нэг бөгөөд жилд дөрвөн мянга гаруй хүн өвдөж, оношлогддог.

Монгол Улсад сүрьеэгийн халдварт өртсөнөөр өрхөөс гарах зардлын үр дүнгээр олон эмийн тэсвэртэй сүрьеэд өртсөн өрхийн 85 хувь, эмэнд мэдрэг сүрьеэд өртсөн өрхийн 65 хувь нь санхүүгийн дарамтад орж буй зэрэг нь сүрьеэ өвчнөөс урьдчилсан сэргийлэхэд бусад салбар, иргэний нийгмийн оролцоо шаардлагатай байгааг харуулж байна.

2018 оны есдүгээр сард АНУ-д зохион байгуулагдсан НҮБ-ын 73 дугаар чуулганаар сүрьеэгийн асуудлыг анх удаа хэлэлцсэн. Сүрьеэтэй тэмцэх улс төрийн тунгхагийг баталсан юм. Үүний дараа Монгол Улсын Ерөнхий сайдын ивээл дор дээд хэмжээний чуулга уулзалтыг зохион байгуулж, Монгол Улсад сүрьеэ өвчнийг устгах Улаанбаатарын тунхаг бичиг баталсан. Энэхүү тунхаг бичгийн хэрэгжилт болон, сүрьеэ өвчний хэрхэн устгах талаар энэ удаагийн чуулга уулзалтаар хэлэлцэнэ” гэв. 

Д.Батчулуун