Засгийн газрын хуралдаанаас гаргасан шийдвэрийн танилцуулж байна. Энэ үеэр Боловсрол, шинжлэх ухааны сайд Л.Энх-Амгалан мэдээлэл өглөө.

Тэрбээр “Сугалааны цэцэрлэгийн тогтолцоо цаашид Монгол Улсад байх ёсгүй. Монгол Улс яагаад сугалааны тогтолцоонд орсог талаар судалгаа хийж үзсэн. Тухайлбал, Нийслэлийн засаг даргын тамгын газраас архитектур төлөвлөлтийн даалгавар батлуулахдаа 24 цэцэрлэгтэй байна гэдэг даалгавар өгөөд, зураг төслөө батлуулахад 50 хувь багасгачихдаг. Буцаад барилга эхлүүлэхдээ дахин багасгадаг. Улсын комисс хүлээн авахдаа хоёр дахин багсгачихдаг. Ингээд барилгаа бариад явснаар цэцэрлэггүй үлддэг байсан байна хэмээн харж байгаа. Одоогоор нийслэлийн хүрээнд 752 орон сууцны цогцолбор барилга баригдаж байна. Үүнд 20 цэцэрлэг барихаар төлөвлөгдөж байгаа судалгаа бий. Улсын комисс хүлээн авсан барилгын тоо архитектур төлөвлөлтийн даалгаварт зааснаас 41 хувиар багасаж барилгуудбаригддаг учраас цэцэрлэгийн хомсдол үүсэж байна хэмээн бид үзэж байна.

Цаашид цэцэрлэгийн барилга төлөвлөөгүй барилга байгууламжийн зураг төслийг батлахгүй байх, хүлээн авсан баталсан тохиолдолд холбогдох албан тушаалтнуудад холбогдох хууль тогтоомжийн хүрээнд хариуцлага хүлээлгэнэ.

Мөн цаашид архитектур төлөвлөлтийн даалгавар, зураг төслийг батлахад цэцэрлэгийн барилга байгууламжийн зураг төсөл, техник эдийн засгийн үндэслэлийг холбогдох норм дүрмийн дагуу заавал тусгаж, хэрэгжүүлэлтийг хангаж ажиллах Засгийн газрын тогтоол гарсан.

Мөн Боловсролын салбарын газрын тооллого хийсэн. Монгол Улсад 680 орчим төрийн өмчийн сургууль байна. 500 гаруй цэцэрлэг бий. 80 орчим төрийн өмчийн их дээд сургуулиуд бий. Эдгээр сургуулиудын 2015 оноос хойших газрын тооллого хийсэн. Ихэнх сургууль цэцэрлэгийн 70-80 хувь нь хулгайд алдагдсан байна. Хууль бусаар хэн нэгний нэр дээр шилжүүлэгдсэн байна. 12 сургууль цэцэрлэгийн 2,2 га газар, найман их дээд сургуулиудын 1.8 га газар Их дээд сургуулиудын, цэцэрлэгийн захирал, жолоочын эхнэрийн нэр дээр шилжүүлэгдсэн байна.

Мөн тухайн газар дээр орон сууц байгуулж, барьсан СӨХ-ийн нэр дээр бүртгэсэн тохиолдол байна. хөдөө орон нутагт байгаа сургуулиудын газар гадаадын аялал жуулчлалын нэр дээр давхар бүртгэгдсэн тохиолдол байна. Ихэнх сургуулийн спортын талбайн газруудын 70-80 хувь нь бусдын нэр дээр шилжсэн байна.

Иймд газрын эрхийг цуцалж, газрын үнийг буцаан төлүүлэх, шийдвэр гаргасан албан тушаалтнуудад хариуцлага хүлээлгэх зэрэг арга хэмжээнүүдийг хэрэгжүүлэн ажиллана” гэв.

Д.Батчулуун