Манай сайтын цоо шинэ булан болох "Долоо хоногийн онцлох хүн" буланд уншигч та бүхэн тавтай морилно уу. Бид энэхүү буландаа тухайн долоо хоногт олны анхаарлыг татсан нэгнийг онцлох юм.

Энэ долоо хоногийн онцлох хүнээр УИХ-ын гишүүн Э.Бат-Амгаланг нэрлэж байна.

Нэгдүгээр сарын 10. Төрийн ордонд УИХ-ын Хууль зүйн байнгын хорооны хуралдаан болж байлаа. Олон гишүүд, бас олон сэтгүүлчийн нүдэн дээр нэгэн хүн УИХ-ын гишүүн Б.Пүрэвдорж руу салаавч гарган, гарчихъя, үзчихье хэмээн согтуурхсан нь 2020 оны сонгуулиар МАН-аас нэр дэвшин Баянзүрх дүүргээс УИХ-д сонгогдсон Э.Бат-Амгалан байсан юм.

Хэн ч харсан гэмгүй даруухан, улаа бутарсан царайтай тэрбээр үүнээс өмнө нэгэн удаа “хэлд орж” байсан түүхтэй.

Тэр нь өнгөрсөн хавар болсон явдал л даа. Хаврын чуулганы үеэр LRT-г эсэргүүцсэн Ч.Хүрэлбаатар гишүүн рүү хорон үгээр дайрч “хэлд орсон” түүнийг энэ хүртэл олон түмэн УИХ-ын гишүүн гэж нүдлээгүй байв. Ямар сайндаа л “Хүрэлбаатар гэж хэлд орсон гишүүн” гэдэг хочийг Э.Бат-Амгалан гишүүн зүүж байхав. Ийм нэгэн гишүүн дахин олны анхаарлыг татахдаа Төрийн ордонд тохой залган суудаг гишүүд рүүгээ агсамнаж буй дүр төрхөөрөө гарч ирлээ.

Уг нь УИХ-ын гишүүд санаачилсан хууль, хэрэгжүүлсэн ажил үйлсээрээ олонд танигддаг бол Баянзүрх дүүргийн төлөөлөгч гишүүн архи уусан уугаагүй агсамнадгаараа танигдаж байна гэсэн үг.

Харин үйл явдлын маргааш УИХ-ын гишүүн Э.Бат-Амгалан “Огт архи амсаж үзээгүй” хэмээн тайлбар хийсэн нь өөрийнхөө хүзүүнд олс угласан хэрэг болсон. Сошиалаар түүний өмнөө архи өрсөн, нүд нь талимаарсан зургууд хөврөх болсон. Мөн Баянзүрх дүүргийн төлөөлөгч байх үедээ өөрийн эзэмшлийн баарнууддаа нударга зөрүүлж явсан хэргийн хуудсууд сөхөгдөж эхэлсэн...Архи огт амсдаггүй гэж арьсаа хамгаалах гэсэн нь нэг үгээр түүний өмнөх намтрыг сөхөх шалтгаан болсон гэсэн үг. Энэ бүхний эцэст хэлэхэд УИХ-ын хамгийн чимээгүй, хамгийн танигдаагүй гишүүн Э.Бат-Амгалангийн танигдах технологи нь уусан, уугаагүй ангийн нөхдөдөө агсамнах болжээ.

Д.Батчулуун

Гэрэл зургийг Time.mn