Улсын Ерөнхий прокурорын газраас 2012 онд Улсын төсвийн хөрөнгө оруулалтаар прокурорын байгууллагын 41 нэгжийг холбосон өндөр хурдны шилэн кабелийн дэд бүтцийг байгуулаад байна. Шилэн кабелийн дэд бүтэц нь  Улсын Ерөнхий прокурорын газар болон нийслэлд үйл ажиллагаа явуулж буй 12 прокурорын газар, 21 аймаг, 7 сум дундын прокурорын газруудыг хамарсан тасралтгүй ажиллагааны горимтой, нууцлал хамгаалалтыг хангасан сүлжээ юм.
    Шилэн кабелийн сүлжээ байгуулснаар прокурорын байгууллагын үйл ажиллагааны мониторингийн системийн тасралтгүй ажиллагааг хангах, нийт газруудыг хамарсан яриа дуу, дүрс дамжуулах харилцаа холбооны нэгдсэн системийг ашиглах, цаашлаад мэдээллийн технологийн орчин үеийн шинэлэг технологи, оновчтой шийдлүүдийг ашиглан үйл ажиллагаандаа нэвтрүүлэх боломжийг бүрдүүлээд байна.

    Энэхүү шилэн кабелийн сүлжээнд тулгуурлан Нийслэлийн прокурорын газраас харъяа дүүргүүдийн прокурорын газруудыг, Улсын Ерөнхий прокурорын газраас аймаг, нийслэл, тээвэр, дүүрэг, сум дундын прокурорын газруудыг удирдан видео хурал, зайн сургалт зохион байгуулах боломжтой системийг  суурилуулаад байна.  Видео хурлын систем нь нэгэн зэрэг 40 газартай холбогдох боломжтой, хурлын явцыг бичиж хадгалах серверүүд болон удирдлагын төвтэй орчин үеийн тоног төхөөрөмж юм. Видео хурлын системийг суурилуулснаар орон нутгийн прокурорын газартай хурал зөвөлгөөн, сургалт семинар зохион байгуулахад цаг хугацаа, зардал хэмнэх, аймгийн прокурорын газруудын үйл ажиллагаанд ойр байж удирлага зохион байгуулалтаар хангах, нийслэл, орон нутаг дахь прокурорын газрууд харилцан туршлага судлах зэрэг ач холбогдолтой юм.
    Мөн Улсын Ерөнхий прокурорын газар, ГОУХАН-ийн Эдийн засгийн тогтвортой хөгжлийн эрх зүйн орчинг баталгаажуулах төслийн хамтын ажиллагааны хүрээнд “Прокурорн байгууллагын үйл ажиллагааны мониторингийн систем”-ийг боловсруулан хийж гүйцэтгээд байна. Энэ систем нь прокурорын байгууллагын өдөр тутмын үйл ажиллагаа, удирдлага зохион байгуулалтын ажлын бүртгэл хяналтын хэсэг, гэмт хэргийн шинжтэй гомдол, мэдээлэл, эрүүгийн хэрэг болон шүүх хуралдааны бүртгэл,  ял эдлүүлэх ажиллагаатай холбоотой бүртгэл, Эрүүгийн хэргийн төв архивын бүртгэл зэрэг олон бүртгэлийг багтаасан, мэдээллийн нэгдсэн бааз бүхий цогц систем юм.
    “Прокурорын байгууллагын үйл ажиллагааны мониторингийн систем”-ийг 2010 оноос эхлэн боловсруулалт, хөгжүүлэлт хийсэн бөгөөд 2012 оны турш зарим аймаг, дүүрэг, нийслэлийн прокурорын газруудад туршилт хийн 2013 оны 01 сарын 02-оос нийт газруудад бүрэн ашиглахаар төлөвлөөд байна. Дээрх системийг “Эдийн засгийн тогтвортой хөгжлийн эрх зүйн орчинг баталгаажуулах төсөл”-ийн санхүүжилтаар “MCS” ХХК-ий програм хангамжийн газартай хамтран гүйцэтгэсэн болно.