Сангийн сайд Б.Жавхлан дахин өргөн барьсан 2025 оны төсвийг танилцууллаа.

Тэрбээр "УИХ-аас тогтоол гарч, 2024 оны арванхоёрдугаар сарын 10-ны дотор төсвийг өргөн барих үүрэг өгсөний дагуу Засгийн газар 2025 оны төсвийн тухай хуулийн төслийг хугацаандаа дахин өргөн барилаа.

Тухайлбал, хамгийн өндөр өсөлттэй нь Гэр бүл, хөдөлмөр, нийгмийн хамгааллын сайдын багц. Тэтгэврийн хэмжээг 6 хувиар нэмэгдүүлнэ гэхэд л 300 тэрбумын өсөлт. Хэрэгжих хугацаа нь 2025 оны нэгдүгээр сарын 1-нээс эхэлнэ. Жил бүр үнийн өсөлттэй холбоотойгоор цалин, тэтгэврээ нэмүүлэх асуудал гарахгүй, шууд нэмэгдээд явна. НДС-ийн тэтгэвэр авагчийн тооны өсөлтөөр 197 тэрбумын зөрүү гарч байна. Мөн 2024 оны 4 дүгээр сард тэтгэврийг 100 мянган төгрөгөөр нэмсэн. Ирэх жил гурван сарын зөрүү гарч ирнэ. Түүнчлэн төрийн албан хаагчдын цалинг 6 хувиар нэмнэ. Гэхдээ Засгийн газар төсөвтэйгөө уялдуулж бодлогоор нэмнэ. Нийт цалингийн сан 7 их наяд төгрөг. Үүний 6 хувь нь 438 тэрбум төгрөг.

Эрчим хүчний салбарын төсөв 177 тэрбум төгрөгөөр нэмэгдэж байгаа. Ирэх жилүүдэд хууль тогтоомж нь аль хэдийн гарсан, төсөвт багтахгүй хүлээгдэж байгаа 4.5 их наяд төгрөгийн зардал бий. Төсвийн урсгал зардлыг танах талаар ярихын тулд эдгээр том хууль тогтоомжтой "ноцолдох" шаардлагатай. 

Анх өргөн барьсан төсвөөр 1.8 их наядын хөрөнгө оруулалт тусгаж, хуулиараа хоёр хувийн алдагдал буюу 1.9 их наяд төгрөг байхаар тооцоолсон. Алдагдалгүй төсөв рүү зорихоор хөрөнгө оруулалт, орлого хасагдана.

Нийт 2.3 их наяд төгрөгийн зардал хасах шаардлага гарч байна. Тиймээс орлого 394 тэрбум төгрөгөөр буурна.

Нийт урсгалд зардалд 26 их наяд төгрөгийг төсөвлөж байсан бол 18.2 их наяд төгрөгийн зардлыг огт хөндөөгүй. Бид шилжиж байгаа төсвийг танаж болохгүй. Төслийг зогсоож болохгүй, он дамжих тусмаа төсөвт өртөг нь нэмэгдэнэ. Мөн урсгал зардал дээрээ бага үнэтэй тавилга, техник хэрэгслээ хэмнэнэ. Үлдсэн 9 их наядын зардлаас жигд 10 хувь хасна. Бүсчилсэн хөгжлийн хөрөнгө оруулалтын 38 шинэ төслөөс 10-ыг нь хойшлуулж, 502 тэрбумаар буурсан. 

Боловсролын салбарын төсөв 120 тэрбумаас 32 болж өргөн баригдсан. Ирэх жил 91 төсөл хэрэгжихийн 48 нь сургууль, цэцэрлэг. Үүнд 35 тэрбум төгрөг шаардлагатай. Үүнээс 20 хувийн хэмнэлт хийхээс өөр аргагүй. Салбарын бодлогын сорилт болж байна" гэв.