Монгол Улсын Засгийн газрын мөрийн хөтөлбөр, “Алсын хараа 2050” Монгол Улсын урт хугацааны хөгжлийн бодлогын хүрээнд нийслэлийн Хан-Уул дүүргийн нутаг дэвсгэрт хэрэгжүүлж буй “Солонго-1”, “Солонго-2”, “Залуус-1”, “Эко Яармаг” орон сууцны хороолол барих төслүүдийн ажлын явцтай УИХ-ын гишүүн Ж.Алдаржавхлан, ХББОС-ын сайд Ж.Батсуурь, ХБОСБЗГ-ын дарга Ц.Адъяабаатар, ББМБЗГ-ын Барилгын материалын хэлтсийн дарга Д.Батзориг, нийслэлийн Засаг даргын орлогч А.Амартүвшин нар газар дээр нь очиж, танилцлаа.

Төслийн хэрэгжилтийг танилцуулах үйл ажиллагаанд “Төрийн орон сууцны корпораци” ТӨХХК-ийн Гүйцэтгэх захирал Э.Тамир, “Солонго-1”, “Солонго-2” төслийн ерөнхий гүйцэтгэгч “Колон Глобал” корпораци, “Мүүён Си Эм” ХХК-ийн Төлөөний газрын төлөөлөл болон албаны бусад хүмүүс оролцов.

Энэ үеэр “Солонго 1, 2” орон сууцны төслийн хэрэгжилтийн явцад тулгамдаад буй сургууль, цэцэрлэгийн барилга, автозамын асуудлыг хэлэлцэж, тус төслийн баруун талаар тавигдах авто замын төсвийг нийслэлийн хөрөнгө оруулалтаар хийхээр нэгдсэн байр сууринд хүрлээ.

Мөн УИХ-ын гишүүн Ж.Алдаржавхлан болон нийслэлийн холбогдох албан хаагчидтай уулзаж, сургууль, цэцэрлэгийн хүртээмжийг нэмэгдүүлэх ажлын хүрээнд ХББОСЯ-аас “ТОСК” ТӨХХК-ийн эзэмшлийн газарт 960 хүүхдийн сургууль барих нэг маягийн зураг төсвөөр хангах, бусад талууд улсын болон нийслэлийн төсөвт дээрх төслийн санхүүжилтийг тусгуулж ажиллах талаар төслийн талбайд ажиллах үеэрээ тохиролцлоо.

Дээрх төслүүд нь Монгол Улсын Засгийн газраас баримталж буй тэргүүлэх зорилтууд болох иргэдийг орлогод нийцсэн орон сууцаар хангах, агаар, орчны бохирдлыг бууруулах, иргэдийг ая тухтай, эрүүл, аюулгүй орчинд амьдрах, агаар, хөрсний бохирдлыг бууруулахад чухал ач холбогдол үзүүлэх юм.