Зохиолч, яруу найрагч Дамдинсүрэнгийн Урианхайн "Одоо л би амьдарч эхлэх нь" номыг дэлгэж үзээд гайхширсан билээ би. Яруу найрагчийн гар бичмэл, төдий л уншигчдад үзэгддэггүй "нууц". Тэр "ховор эд" зүгээр л гарт минь ороод ирэх мөч. Судлаачдад хүртэл олдохоо байсан гээд хэлчихмээр үнэт зүйл шүү дээ. Судлаачид уран бүтээлийн үнэ цэн, зохиолчийн хөдөлмөр зэргийг нээхдээ ашигладаг тийм гар бичмэл. Магадгүй, номдоо зориулж хичээнгүйлэн бичсэн байж болох ч ховроос ховор нь гарцаагүй.
"Одоо л би амьдарч эхлэх нь" түүврийг AUM паблишинг болон Д.Урианхай судлалын академиас эмхэтгэн уншигчдад хүргэжээ. Тухайн түүвэрт Д.Урианхай абугайн сүүлийн үед бичсэн шинэ шүлгүүд багтсан байна.
Эл шүлгийн түүврийг эргүүлмэгцээ би эмзэглэлтэй таарсан билээ. Эмзэг зовуурь, ганцаардалтай тулгарсан юм.
Д.Урианхай “Хүний амьдрал нас насанд шинээр эхэлдэг юм байна. Нас насны амьдрал цоо шинэ үзэгдэл юм байна. Би 20 гаруй настайгаасаа л шүлэг бичсэн. Бичсэн шүлгүүд минь гурван мянга руу дөхөж яваа болов уу. Одоо л нэг сайхан шүлэг биччихмээр санагдаад байна.
Яруу найраг гэдэг учир нь ойлгогддоггүй зүйл. Би хоёр мянган шүлэг бичиж, хориод ном биччихээд учрыг нь олоогүй л байна.
Одоо л нэг тэмтэрч эхлээд байна” гэж өгүүлжээ. Магад, яруу найргийн эрэлд яваа эрхэм зохиолчийн гар бичмэлийг номын сандаа, ширээндээ залах нь.
Түүврийг нээмэгц гарч ирсэн ганцхан шүлгийг энд эш татан буулгалаа. Цааш хэрхэхээ уншигчид мэднэ.
Д.Урианхай| Харих гэж яарч яваа ч…
Харих гэж яарч яваа ч
Хаалга минь түгжээтэй,
Өрөө минь харанхуй,
Хамгийн гол нь- Өөрийг минь хулээж суугаа хүнгүй болохоор
Сэм сэмхэн гунигт бодол цээжээр сэрхийгээд
Сэтгэлд нисэж явсан хараацай
Гэнэт, газарт унана!..
Өвөл! Байшингууд цасанд дараатай,
Хачин жихүүн энэ өдөр
Хаалга минь түгжээтэй,
Өрөө минь харанхуй
Ядаж ялаа ч нисэхгүй,
Хамгийн гол нь-
Өөрийг минь хүлээж суугаа хүнгүй болохоор
Хаалганы бариулын төмөр
Нүд хайрах шиг болно…
2024.01.11
Улсын нэгдсэн III эмнэлэг,
"Уламжлалт эмчилгээний тасаг" хэмээн шүлгийн төгсгөлд бичжээ.
