Хуулийн хугацаандаа арайхийн багтаж Г.Занданшатарын Засгийн газар ирэх оны Төсвийн тухай хуулиа батлуулж байсан цаг саяхан. Ердөө сарын өмнө баталсан энэ хуулийн дагуу л ирэх онд төрийн болоод улс төрийн албан хаагчид цалинжиж, улсын мөнгийг зарцуулна гэсэн үг.

Гэтэл өнгөрсөн долоо хоногт Засгийн газар гэв гэнэт л 16 дэд сайдыг томилж засгаа занхайлгаж, төрөө данхайлгасан. Ирэх оны төсвийн тухай хуулийн төслийг хэлэлцэх үеэр дэд сайд нарыг томилох тухай огт хөндөгдөөгүй хийгээд тэр дагуу төсөвт ч зардал тусгаагүй байхад Г.Занданшатарын Засгийн газар ийм томилгоо хийсэн нь шулуухан хэлэхэд нүд рүүгээ хуруугаа хийсэн үйлдвэл байв.

АН-ынхан ч энэ завшааныг ашиглан Засгийн газрыг огцруулах бичиг өргөн барихаар бүлгийн даргынхаа албан баланк дээр гарын үсэг цуглуулаад эхэлсэн. Тэдний хувьд өнгөц харахад энэ нь улс төрийн акц мэт боловч үнэн хэрэгтээ хууль дээдэлж байгаа чухал алхам юм. Учир нь, төсөвт тусгагдаагүй зардлыг санхүүжүүлэхийг Төсвийн тухай хуулиар хориглосон байдаг. Тодруулбал, дэд сайдын томилгоог АН-ынхан эсэргүүцэж байгаа нь Засгийн газрыг хууль зөрчихөөс л аварч байна гэсэн үг. Тйим болохоор оройтоогүй дээрээ нүд рүүгээ хийсэн хуруугаа ав, Ерөнхий сайд аа. Төсөвт тусгаагүй байж дэд сайдыг томилж байгаа нь хэн нэгэн эгэл жирийн төрийн албан хаагчийн илүү цагийн нэмэгдэл, урамшууллыг хасах тухай л яриа шүү дээ. Улс төрийн томилгооны чинь төлөөс төрийн жинхэнэ албан хаагчдын халаас байх учиргүй.

А.Сүх