Хүнс, хөдөө аж ахуй, хөнгөн үйлдвэрийн сайд М.Бадамсүрэнгийн орон нутаг дахь томилолт Сүхбаатар аймагт үргэлжилж байна. Тэрбээр өнөөдөр Аймгийн онцгой комиссын өргөтгөсөн хуралдаанд оролцож, өвөлжилтийн нөхцөл байдал, тулгамдаж буй асуудалтай танилцав.

Сүхбаатар аймгийн Засаг дарга бөгөөд Онцгой комиссын дарга М.Идэрбат Зудын эрсдэл, байгалийн гамшгийн улмаас нийт малын 60 гаруй хувийг алдсан нь аймгийн эдийн засагт маш том эрсдэл учруулсан. Эдийн засгийн бааз сууриа сэргээх, иргэдийн амьдралыг сайжруулахад төрийн бодлого дэмжлэг хэрэгтэй байна гэв. Тухайлбал, Хоршоо хөгжүүлэх сангийн журмыг шинэчлэх,  татварын дарамтыг бууруулах, өвс экспортлохыг хориглосон шийдвэрийн улмаас өвс эргэлтэд орохгүй хаягдах эрсдэл үүсгэж байгааг уламжиллаа.

Хуралдаанд Аймгийн Хүнс, хөдөө аж ахуйн газар, Мал эмнэлгийн газраас цаг үеийн асуудлаар мэдээлэл өгөв. Өнгөрсөн хугацаанд олон улсын төсөл хөтөлбөр, орон нутгийн түншлэлээр Баяндэлгэрийн улаан үүлдрийн ухнын халуун үрээр 17 малчин өрхийн 605 ямаанд хээлтүүлэг хийж, гүн хөлдөөсөн үрээр 130 үнээнд зохиомол хээлтүүлэг хийх ажил зохион байгуулж, цаашид Түмэнцогт сумын үржлийн үхрийн цөм сүргийн үйл ажиллагааг дэмжих,  өндөр ашиг шимт малын үр, хөврөл үр шилжүүлэн суулгах төв байгуулахаар зорин ажиллаж байгаа аж. Мөн “Нутгийн сүү”  сүүний үйлдвэр байгуулан 2025 оны арваннэгдүгээр  сараас үйл ажиллагаа явуулж эхэлжээ.

Онцгой комиссын гишүүд, хуралд оролцогчдын зүгээс цэвэр үүлдрийн мал тэр дундаа сүүний чиглэлийн үхэр олгох, хөнгөлөлттэй зээлийн хүүг бууруулах, алслагдсан баг, сумдад хүрч туулах чадвартай автомашины дэмжлэг үзүүлэх, сум орон нутагт мал эмнэлгийн лаборатори байгуулах,  улсын төсвийн хөрөнгөөр Баруун-Урт хотод баригдсан Мал эмнэлгийн халдваргүйжүүлэлтийн пунктыг ашиглалтад оруулахад эрх зүйн дэмжлэх зэрэг санал дэвшүүлэв.

ХХААХҮ-ийн сайд М.Бадамсүрэн малын үүлдэр угсааг сайжруулах чиглэлээр олон санал санаачилга гарган ажиллаж буй Сүхбаатарчуудад талархал илэрхийлээд салбарын шинэчлэлээ “Улсын аварга малчин” шагналаас эхлүүлж,  малын ашиг шимт байдлыг гол үзүүлэлт болгосноо тэмдэглэв.

Тэрбээр “Шагналын тооноос илүү нийт малчдын нийгмийн баталгааг хангах, амьдралыг чанарыг дээшлүүлэх, малын тооноос илүү ашигт шимт байдлыг дэмжсэн бодлого хэрэгжүүлж ажиллана. Малын үүлдэр угсааг сайжуурлахад эцэг мал чухал. Цаашид Малын удмын сангийн үндэсний төвийн үйл ажиллагааг Хөдөө аж ахуйн корпорацитай уялдуулан бүс, орон нутгийн онцлогт тохирсон үржлийн цөм сүрэг бий болгох ажлыг зохион байгуулна” хэмээв.

Зудын урьдчилсан төлвийн мэдээгээр Сүхбаатар аймгийн нийт нутгийн 2,7 хувь маш бага, 56,3 хувь нь бага, 30 хувь нь дунд, 11 хувь нь их эрсдэлтэй гарсан байна. Тодруулбал, Уулбаян-Түвшинширээт сумын зааг нутаг, Онгон, Баянндэлгэр сумдад өвөлжилт хүндэрч болзошгүй байна.