Ерөнхий сайд Г.Занданшатар нийслэлийн болон 21 аймгийн засаг дарга, ИТХ-ын дарга нартай уулзлаа. Энэ үеэр аймгийн засаг дарга нараас цаг үеийн асуудлаар тодруулга авлаа. Иймд тэдний өгсөн мэдээллийн онцлон хүргэж байна.
Өмнөговь аймгийн Засаг дарга Н.Энхбат: Манай аймаг энэ жил улсад 1,1 их наяд төгрөгийг улсад төвлөрүүлнэ
Тэрбээр "Даланзадгадад 50МВт-ын хүчин чадалтай дулааны цахилгаан станц барих төслийг санхүүжүүлэх зорилгоор 500 тэрбум төгрөгийн бонд гаргасан. Манай аймаг дулааны цахилгаан станцаа 25 жил ашиглаад, ашиглалтын хугацаа дууссан. Орон нутаг, улсын төсөвт ачаа болгохгүйгээр бонд босгоод явах шийдвэрийг гаргасан. Өмнө нь орон нутгийн, аймгийн бонд гэж байгаагүй учраас хөөцөлдөх зүйл ихтэй, дүрэм журамд нь өөрчлөгдөх зүйлс байна. Мөн Гурвансайхан нисэх буудлын өргөтлийг 2026 онд орон нутгийн төсвийн хөрөнгө оруулалтаар хийнэ. Энэ жил манай аймаг 2,1 их наяд төгрөгийн төсөвтэй байгаа. Улсад 1,1 их наяд төгрөгийг улсад төвлөрүүлнэ" гэв.
Завхан аймгийн Засаг дарга Г.Өнөрбаяр: Энэ жил дулааны станцийн цэвэр бохир усны шугам сүлжээний ажлыг шийднэ
Тэрбээр "Суманд газар олгох асуудлыг Засгийн газар мэддэг болоод удаж байна. Үүнээс болж нэг аж ахуй нэг суманд газар авахын тулд жил тойрдог болсон. Үүнийг сумын засаг дарга нарт нь эрх мэдлийг нь шилжүүлье гэх асуудлын ярьсан. 10 аймагт Дулааны цахилгаан станц барина гэсний нэг нь манай аймаг байгаа. Энэ онд дулааны станцийн цэвэр бохир усны шугам сүлжээний ажлыг шийднэ" гэв.
Дорноговь аймгийн Засаг дарга О.Батжаргал: Дулааны цахилгаан станцыг барих компани нь шалгарчихсан
Тэрбээр "Манай аймаг энэ онд хувийн хэвшлийн түншлэлээр 70 мВт дулааны цахилгаан станц барихаар холбогдох бүх зөвшөөрлийг нь авчихсан. ТЭЗҮ-г нь гаргаад тендерт барих компани нь шалгарчихсан байгаа" гэв.
Төв аймгийн Засаг дарга Л.Төмөрчөдөр: АНУ-аас 30, Филлипинээс 10 багшийг авч ирэх төлөвлөгөөтэй байна
Тэрбээр "2025 онд Төв аймаг улсдаа боловсролын чанараараа хамгийн сүүлд орсон. Үүн дээр анхаарах үүднээс энэ онд АНУ-аас 30, Филлипинээс 10 багшийг авч ирэх төлөвлөгөөтэй байгаа. Энэ багш нарыг айлд амьдруулна. Нэг багш сарын 2.3 сая төгрөгийн өртөгтэй байна" гэв.
Сэлэнгэ аймгийн Засаг дарга Н.Лхагвадорж: 2026 онд Мандал сумандаа дулааны цахилгаан станц барина
Тэрбээр "2026 онд Мандал сумандаа дулааны цахилгаан станц барина. Мандал сум бол Монгол Улсдаа томоохон сумдын нэг. Тийм учраас хөгжлийн гол тулгуур болох цахилгаан, дэд бүтцийн асуудлыг анхаарахгүй бол болохгүй байна. Мөн уурын зуухнууд маш хүндрэлтэй байгаа. Бүх аймгуудын зовлон жаргал нэг байна" гэв.
Хэнтий аймгийн Засаг дарга Д.Аюурбунь: Жуулчдыг татах төлөвлөгөө боловсруулан ажиллаж байна
Тэрбээр "Их Монгол Улс байгуулагдсаны 820 жилийн ой энэ жил тохионо. Тиймээс аялал жуулчлалын цогцолборуудаа эдийн засгийн эргэлтэд оруулж, жуулчдыг татах төлөвлөгөө боловсруулан ажиллаж байна" гэв.
Увс аймгийн ИТХ-ын дарга П.Баттулга: “Улаангом" захыг сэргээн босгох тал дээр Засгийн газартай хамтран ажиллаж байна
Тэрбээр “Улаангом зах” бол 12 жил үйл ажиллагаа явуулсан байсан. Улсын төсвийн хөрөнгөөр барьсан. Гурван аймагт ийм зах барьсан ч хоёр нь шатчихсан байна. Сэргээн босгох тал дээр Засгийн газартай хамтран ажиллаж байна" гэв.
