Төв аймгийн 27 сумын ИТХ-ын дарга, Засаг дарга, ИТХ-ын Нарийн бичгийн дарга, Тамгын газрын дарга, Багийн дарга нарын нэгдсэн уулзалт Зуунмод хотод зохион байгуулагдлаа. Уулзалтад УИХ-ын гишүүн, УИХ дахь МАН-ын бүлгийн дарга Ж.Батжаргал оролцож, УИХ-ын үйл ажиллагаа, бодлого хөтөлбөр, өвөлжилтийн нөхцөл байдал, цаг үеийн асуудлаар мэдээлэл хийв.
Сумдын удирдах албан тушаалтны манлайлал, ур чадвар, ёс зүй, сахилга хариуцлагыг дээшлүүлэх замаар Монгол Улсын Засгийн газрын үйл ажиллагааны хөтөлбөр, эдийн засгийн өсөлтийг иргэдэд хүргэх 300 хоногийн ажлын төлөвлөгөө, аймгийн дунд хугацааны бодлого хөтөлбөрүүд, хөгжлийн жилийн төлөвлөгөөнд тусгасан зорилго, зорилтыг орон нутгийн түвшинд бодитой, үр дүнтэй хэрэгжүүлэх нь чухал.
2026 онд бүсчилсэн хөгжлийн хүрээнд Төв аймагт улсын төсвийн 235,0 тэрбум төгрөгийн хөрөнгө оруулалтаар авто зам, инженерийн дэд бүтэц, барилга байгууламжийн бүтээн байгуулалтын ажлууд хийгдэж, нийгмийн салбарт нэлээдгүй төсөл хөтөлбөрүүд хэрэгжинэ.
