Хүнс, хөдөө аж ахуй, хөнгөн үйлдвэрийн сайд М.Бадамсүрэн, Бодлого, төлөвлөлтийн газрын дарга Ц.Болорчулуун нар Сэлэнгэ аймагт ажиллаж байна. Энэ үеэр Сэлэнгэ Баруунбүрэн сумын “Эйл Би Эйч агро” ХХК-ийн үйл ажиллагаатай танилцаж, “Улсын аварга тариаланч хамт олон” шагналыг нь хүндэтгэн гардуулав.
ХХААХҮ-ийн сайд М.Бадамсүрэн газар тариалан, эрчимжсэн мал аж ахуй, тэжээлийн үйлдвэрлэл эрхэлдэг тус компанийн үйл ажиллагаа Засгийн газрын бодлоготой нягт уялдаж байгааг тодотгоод “Өндөр ашиг шимт бэлчээрийн болон эрчимжсэн мал аж ахуйг сайжруулахад онцгойлон анхаарч, судалгаа шинжилгээг эрхэмлэн, нэмүү өртөг шингэсэн үйлдвэрлэлийг өргөжүүлэн, орон нутаг ажлын байр бий болгож, нийгэм, эдийн засгийн хөгжилд үнэтэй хувь нэмэр оруулж байна. Та бүхний цаашдын ажил, хөдөлмөрт нь өрнүүн амжилт хүсье” гэлээ.
Тус хамт олны амжилтаас онцолбол, “Мимо агро парк” төслийн хүрээнд өдөрт 50 тонн тусгай найрлагат тэжээл үйлдвэрлэх хүчин чадалтай “Хүчит тэжээлийн үйлдвэр"-ээ нээж, бэлчээрийн аж ахуй, мал аж ахуйн чиглэлээр судалгаа шинжилгээ туршилт үйлдвэрлэлийн үйл ажиллагаа явуулдаг хөдөө аж ахуйн цогцолбор байгуулжээ.
Мөн Бүгд найрамдах Энэтхэг улсын TStanes компанитай хамтран Ургамал хамгааллын Эрдэм шинжилгээний хүрээлэнгийн хяналтан дор бүс нутагт тохирсон эрдсийн органик бордоог гурван жилийн хугацаанд туршиж үр дүнгийн баталгаажуулж авсан. Уг бордоо нь улаанбуудай болон мод, бутлаг ургамал, хүнсний ногоонд тохиромжтой бөгөөд тус аж ахуйн нэгжид 2025 онд тариалсан улаанбуудайг хэт халалт, гангийн үед өндөр ургац авах нөхцлийг бүрдүүлжээ.
Цаашид загвар бүхий хүлэмжийн аж ахуй, эрчимжсэн мал аж ахуй болох мах сүүний ферм, бүс нутгийн иргэдийн бүтээсэн бүтээгдэхүүнүүдийг борлуулах хөдөө аж ахуйн худалдааны төвийг байгуулахаар зорьж байгаа аж.
“Эйл Би Эйч” ХХК нь 2019 оноос эхлэн монгол малын онцлогт тохирсон тэжээлийн найрлага, туршилт судалгааг хийж, 2022 онд Монгол Улсад анх удаа хоногт 30 тонн үйлдвэрлэх хүчин чадалтай эрдэс тэжээлийн үйлдвэрийг байгуулж байв. Тус компани 10 мянган квт-н өөрийн өндөр хүчдлийн цахилгаан хангамжтай. Орхон голын дагуу 3280 га эргэлтийн талбайтай бөгөөд автомат усалгааны системээр тоноглогдсон 900 га тариалангийн талбайтай. Усалгаатай тариалан эрхэлснээр нэгж га талбайгаас 25-30 цн ургац хураан авч байна.
