Улстөрчид, төрийн албан хаагчид, бизнесмэнүүд холбогдсон Хөгжлийн банкны хэрэг гурван жил өнгөрсөн ч шийдэгдээгүй хэвээр байна. Тухайлбал, 2022 онд Хөгжлийн банкнаас зээл авсан компаниудын удирдлага болон холбогдох хүмүүсийг АТГ-аас шалгаж эхэлсэн байдаг. Хөгжлийн банкны гэх уг хэрэгт холбогдуулан 80 хүн, дөрвөн хуулийн этгээд холбогдуулан Сүхбаатар дүүргийн Эрүүгийн хэргийн анхан шатны шүүхэд шилжүүлсэн байдаг. Уг хэргийг Сүхбаатар дүүргийн Эрүүгийн хэргийн анхан шатны шүүх 2023 оны долдугаар сарын 7-нд хэлэлцэн шийдвэрлэсэн. Харин Нийслэлийн Эрүүгийн хэргийн давж заалдах шатны шүүх хэлэлцэж 2024 оны гуравдугаар сарын 22-нд магадлал танилцуулсан. Үүний дараа Улсын дээд шүүх хянаад 2024 оны арванхоёрдугаар сарын 10-нд тогтоол гаргасан байдаг. Дээд шүүх хэргийг дахин хэлэлцүүлэхээр анхан шатны шүүхэд буцаасны дагуу Сүхбаатар, Чингэлтэй, Баянзүрх дүүргийн Эрүүгийн хэргийн анхан шатны шүүх хэлэлцэж 2025 оны есдүгээр сард шийдвэр гаргасан.
Энэ мэт уг хэргийг анхан шатны шүүхээр хоёр удаа, давж заалдах шатны шүүхээр нэг удаа хэлэлцсэн. Дээд шүүх нэг удаа хянаад анхан шатны шүүхэд буцаасан.
Ийнхүү гурван жил үргэлжилсэн Хөгжлийн банкны гэх хэрэг сүүлдээ улс төрийн өнгө аястай байж болзошгүй байна. Тухайлбал, Ерөнхий сайд асан, УИХ-ын гишүүн Н.Алтанхуяг уг хэрэгт холбогдсон бөгөөд түүнийг анхан болон давж заалдах шатны шүүх гурван удаа цагаатгасан.
Цагаатгахдаа “Н.Алтанхуягт холбогдох хэрэг буюу Засгийн газрын шийдвэртэй холбоотой асуудлыг шүүх дүгнэх боломжгүй. Энэ бол шүүх эрх мэдэл, засаглах эрх мэдлийн хоорон дахь тэнцэлтэй холбоотой” гэж байсан. Гэсэн ч энэ онд дахин шүүх аж. Тодруулбал, Хөгжлийн банкны хэргийг Нийслэлийн Эрүүгийн хэргийн давж заалдах шатны шүүх дахин хэлэлцэж, дараа нь Дээд шүүх рүү шилжүүлэх юм.
