“Нээлттэй, цэгцтэй – Ардчилсан Нам” Үндэсний аяны хүрээнд Намын гишүүддээ “Ардчиллын гэрэгэ” олгох хүндэтгэлийн арга хэмжээг Ардчилсан Намаас цувралаар зохион байгуулж байна. 

     Энэ хүрээнд Ардчилсан Намын дарга, УИХ дахь Ардчилсан Намын бүлгийн дарга О.Цогтгэрэл “Нэг Монгол” хөдөлгөөний гишүүдтэй золголт хийж, “Ардчиллын гэрэгэ”-г гардууллаа.

     Уулзалтын үеэр намын дарга ардчиллын үнэт зүйл, институцийн бэхжилтийн талаар байр сууриа илэрхийлэв.

Тэрбээр “Ардчилал бол нэг удаагийн ололт биш, харин байнга хамгаалж, баталгаажуулж, төгөлдөржүүлж байх ёстой тогтолцоо. Тиймээс ардчиллыг дархлан баталгаажуулна гэдэг нь хууль дээдлэх ёс, хүний эрх, ил тод байдал, хариуцлагын тогтолцоог институцийн түвшинд бэхжүүлэхийг хэлнэ” гэв.

Түүнчлэн Намын дүрмийн өөрчлөлтийг боломж гэж харж байгаа учраас дүрмийн шинэчлэлээр Ардчилсан Нам илүү нээлттэй, цэгцтэй нам болж төлөвшинө гэжээ.