Ардчилсан нам дотоод шинэчлэлээ эрчимжүүлж, “нээлттэй, цэгцтэй” үзэл баримтлалыг дэвшүүлэн ирэх сонгуульдаа бэлтгэж эхэлсэн. 1990 оны ардчилсан өөрчлөлтөөс хойших түүхэн замнал, намын дотоод хуваагдал, сорилтуудын дараа ийнхүү шинэчлэл ярьж буй нь нэг талаар авууштай алхам, нөгөө талаар бодит үр дүнгээр хэмжигдэх шалгууртай үйл явц юм.

     Намын дарга, УИХ дахь АН-ын бүлгийн дарга О.Цогтгэрэл дотоод шударга ёсыг дэмжиж, албан тушаалын наймаа, хуйвалдаанаас ангид ажиллана гэж мэдэгдсэн нь эерэг дохио мэт боловч бодит хэрэгжилт хэрхэх нь хараахан тодорхойгүй байна.

Тэрбээр “Ардчиллын гэрэгэ”-ээр Америкийн виз гаргуулахад хялбар болно гэх агуулгатай тайлбар хийж гэрэгэ гардуулсан нь олон нийтийн шүүмжлэл дагуулж, улмаар тэрбээр үгээ залруулан ардчиллын үр дүнд монголчууд гадаадад чөлөөтэй зорчих боломж өргөжсөн гэдгийг бэлгэдсэн утгаар хэлсэн хэмээн залруулсан.

     Гэсэн хэдий ч намын цахим шилжилттэй холбоотой асуудлууд бүрэн дууссангүй. Тодруулбал, зарим иргэдийн хувийн мэдээллийг зөвшөөрөлгүй ашигласан гэх мэдээлэл гарсан.

     Хуулийн хүрээнд “Монгол улсын Их Хурлын Сонгуулийн тухай хууль”-ийн хорьдугаар зүйлийн 15 дахь хэсэгт “Улсын бүртгэлийн асуудал эрхэлсэн төрийн захиргааны байгууллага ээлжит сонгуульд оролцохоор бүртгүүлсэн нам, эвслийг төлөөлөх эрх бүхий этгээдийн хүсэлтийн дагуу энэ хуулийн 20.9-т заасан сонгогчдын нэрийн жагсаалтын сонгогчдын эцэг /эх/-ийн болон өөрийн нэр, иргэний бүртгэлийн дугаар, байнга оршин суугаа газрын хаяг бүхий хэсгийг санал авах өдрөөс 20-иос доошгүй хоногийн өмнө болон санал авах өдрөөс 3 хоногийн өмнө тус тус цахим хэлбэрээр олгоно” гэж хэмээн заажээ.

Энэ дагуу мэдээллийг тус заалтад нийцүүлэн, хуулийн дагуу цахим хэлбэрт шилжүүлсэн хэмээн АН-ын удирдлагууд мэдээллээд байна.

Т.Зузу