УИХ ДАХЬ МОНГОЛ АРДЫН НАМЫН БҮЛЭГ 2025 ОНЫ НАМРЫН ЧУУЛГАНЫ ХУГАЦААНД:

Намрын ээлжит чуулганы хугацаанд МАН-ын бүлэг нийт 12 удаа хуралдаж, давхардсан тоогоор 33 хууль тогтоолын төсөл, бодлогын баримт бичиг, цаг үеийн тулгамдсан асуудлуудыг хэлэлцлээ.

Улс орны эдийн засгийн идэвхжил, тэлэлтийг дэмжих, дундаж давхаргыг бэхжүүлэх, төрийн бодлогын уялдаа холбоог сайжруулах эрх зүйн орчныг цаг алдалгүй бүрдүүлэх зорилтын хүрээнд УИХ дахь МАН-ын бүлгийн гишүүд 2025 оны хавар, намрын чуулганы хугацаанд 27 хуулийн төсөл, Улсын Их Хурлын 3 тогтоолын төслийг санаачлан өргөн мэдүүлснээс 8 хуулийн төсөл батлагдаж, 19 хуулийн төсөл, Улсын Их Хурлын 2 тогтоолын төсөл хэлэлцүүлгийн шатанд байна.

Намрын чуулганы хугацаанд Монгол Ардын Намын бүлгээс бүлгийн даргын 15 шийдвэр, бүлгийн хуралдааны 12 шийдвэр гаргаж, иргэд, төрийн болон төрийн бус байгууллагаас ирүүлсэн өргөдөл, санал хүсэлтийг шийдвэрлэх хүрээнд 151 албан бичиг илгээсэн байна.

Бүлгийн гишүүд Байнгын хорооноос гарсан 64 ажлын хэсэгт 33 гишүүн орж ажилласан. Бүлгийн гишүүд улс орныхоо хөгжил дэвшил, иргэдийнхээ амьдралын чанарыг дээшлүүлэх, төрийн бодлогыг тодотгох эрх зүйн орчноо бүрдүүлэх үйл хэрэгт хөгжлийн мэтгэлцээнийг өрнүүлж, УИХ-аас гарч байгаа шийдвэр, бодлогуудыг амьдралд нийцэх нийцэл, үр өгөөжийг дээшлүүлэхэд идэвхийлэн ажиллалаа.