Япон улсаас хотын дарга Х.Нямбаатарын урилгаар ирсэн Улаанбаатар хотын Ерөнхий архитектор Ч.Төгсдэлгэрийг АТГ-аас шалгаж байгаа талаар бид өмнө нь мэдээлсэн.

Улаанбаатар хотын гэр хорооллын газрыг дахин төлөвлөн барилгажуулах, мөн нийслэлийн хэмжээнд ашиглалтын шаардлага хангахгүй нийтийн зориулалттай орон сууцны барилгуудыг буулган дахин төлөвлөх оновчтой хувилбарыг боловсруулж, уг ажлыг эрчимжүүлэхээ Улаанбаатар хотын ерөнхий архитектор Ч.Төгсдэлгэр зарлан хэрэгжүүлж эхэлсэн.

Шинэ залуу боловсон хүчний хувьд сурсан мэдлэг, туршлагаа эх орондоо зориулан ажиллана гэсэн хүлээлт нийгэмд өндөр байсан. Гэвч 2025 оны зургаадугаар сараас эхлэн түүнийг эрх мэдэл, албан тушаалаа урвуулан ашиглаж бусдад барилгын зөвшөөрөл олгосон байж болзошгүй хэргээр АТГ-т шалгаж эхэлсэн талаар хэвлэлүүд мэдээлэх болсон.

Энэ удаад ч мөн түүний үйл ажиллагаатай холбоотой шинэ мэдээллүүд эх сурвалжуудаар гарсаар байна.

Тодруулбал, Улаанбаатар хотын Ерөнхий архитектор Ч.Төгсдэлгэрийн хамаарал бүхий этгээд Б.Ө******  /8811****/ барилга барих зөвшөөрөл хүссэн аж ахуйн нэгжээс их хэмжээний мөнгө нэхсэн байж болзошгүй. Мөн тухайн асуудлыг зөвшөөрөл хүссэн байгууллага нь АТГ-т мэдээлснээр хяналт шалгалтын ажиллагаа эхэлсэн гэх мэдээллүүд хэвлэл мэдээлэл, цахим орчинд гарсаар байна.

Хэрэв дээрх мэдээлэл үнэн болох нь тогтоогдвол нийслэлийн бүтээн байгуулалтын бодлого хэний гарт, ямар нөхцөлөөр шийдэгдэж байна вэ гэсэн асуултыг олон нийтэд тавихад хүргэж байна.

Гэхдээ дээрх мэдээллүүд нь албан ёсоор баталгаажаагүй бөгөөд холбогдох байгууллагын шалгалтын дүнгээр эцэслэн тогтоогдох юм.

Т.Зузу