Бельгийн автомашины худалдаачин 26 настай Клеман Ванденкеркхове ДНХ-ийн шинжилгээгээр Бельгийн хаан Филиппийн дүү, ханхүү Лорангийн төрсөн хүү болох нь батлагдсаны дараа ханхүү цол хүртжээ. Клеманы ээж, Бельгийн дуучин Венди Ван Вантен 1990-ээд онд ханхүү Лорантай үерхэж байсан бөгөөд 2000 оны наймдугаар сард хүүгээ төрүүлсэн байна. Гэвч Лоран ханхүүг түүний төрсөн эцэг гэдгийг Клеманд 16 нас хүрэхэд нь хэлжээ.
20 насандаа Клеман эцэгтэйгээ холбоо барьж, ДНХ-ийн шинжилгээ өгөхийг санал болгосон байна. Ханхүү Лоран зөвшөөрч, тэд хамт эмнэлэгт очсон бөгөөд шинжилгээгээр тэдний төрсөн эцэг, хүүгийн холбоо батлагджээ. Улмаар Лоран ханхүү Клеманыг өөрийн хүү гэдгийг Бельгийн иргэний бүртгэлд албан ёсоор бүртгүүлсэн байна. Уг ёслол ойролцоогоор зургаан сарын өмнө хотын захиргаанд болсон ч энэ тухай саяхан олон нийтэд ил болжээ.
Ингэснээр Клеман эцгийнхээ хувийн хөрөнгөөс өв залгамжлах эрхтэй болж, Лорангийн бусад хүүхдүүдтэй адил эрх эдлэхээр болсон байна. Гэхдээ тэр хааны тэтгэмж авахгүй, хааны гэр бүлийн албан ёсны үүрэг гүйцэтгэхгүй бөгөөд Бельгийн хаан ширээг залгамжлах эрхгүй.
Клеман эцгийнхээ Саксен-Кобург овгийг авах боломжтой ч ээжийнхээ овог болох Ванденкеркховегоо хадгалах хүсэлтэй байгаагаа илэрхийлжээ.
Энэ нь Бельгийн хааны гэр бүлтэй холбоотой нууц хүүхдийн анхны тохиолдол биш. Хуучин хаан Альберт II мөн гэр бүлээс гадуурх харилцаанаас төрсөн охин Делфин Боэлийг 2020 онд өөрийн охин гэдгийг хүлээн зөвшөөрч, улмаар тэрээр гүнж цол хүртэж байжээ.
Л.Баяр
