LVMH группийн охин компани, дэлхийн тансаг зэрэглэлийн брэнд Loro Piana-ийн гүйцэтгэх захирал Фредерик Арно Монголд иржээ. Тэрээр өөрийн албан ёсны инстаграмм хаягдаа Монголын өргөн уудам тал нутгийг агаараас авсан зураг нийтэлж, байршлыг “Ulan Bator, Mongolia” хэмээн тэмдэглэсэн байна. Түүний Instagram хаяг одоогоор 407 мянга гаруй дагагчтай бөгөөд өөрийгөө Loro Piana-ийн CEO гэж танилцуулжээ.
Фредерик Арно 1994 оны арваннэгдүгээр сарын 7-нд төрсөн, одоо 31 настай. Тэр Францын тэрбумтан, LVMH-ийн эзэн Бернар Арно болон төгөлдөр хуурч Элен Мерсье-Арно нарын хүү. Бернар Арногийн таван хүүхдийн хоёр дахь нь юм. Фредерик "École Polytechnique" коллежийг төгссөн бөгөөд 2017 онд LVMH-ийн Швейцарийн цагны брэнд TAG Heuer-т ажиллаж эхэлсэн. 2020 онд буюу ердөө 25 настайдаа тус брэндийн гүйцэтгэх захирал болсон нь дэлхийн бизнесийн хэвлэлүүдийн анхаарлыг татаж байв. Түүний удирдлагын үед TAG Heuer-ийн борлуулалт өссөн гэж мэдээлж байсан.
2024 онд Фредерик LVMH-ийн цагны салбарын гүйцэтгэх захирал болж, TAG Heuer, Hublot, Zenith гэсэн гурван том брэндийн үйл ажиллагааг хариуцах болсон. Харин 2025 оноос тэрээр LVMH-ийн тансаг зэрэглэлийн Loro Piana брэндийн гүйцэтгэх захирлаар мөн ажиллаж байна.
Loro Piana 2025 онд Монголд “Resilient Threads” нэртэй таван жилийн хөтөлбөр эхлүүлж байгаа гэж Sustainable Fibre Alliance мэдээлжээ. Уг хөтөлбөр нь Сүхбаатар аймгийн таван сумын малчин өрхүүдийн амьжиргааг дэмжихийн зэрэгцээ Монголын зүүн талын хээрийн экосистем, биологийн олон янз байдлыг хамгаалах, ноолуурын нийлүүлэлтийн сүлжээг илүү тогтвортой болгох зорилготой гэжээ.
Фредерик Арно нь BLACKPINK-ийн Лизатай үерхдэг гэх мэдээллээр дэлхий даяар олны анхаарлыг татсан. Тэд хамтдаа Парис, Итали зэрэг газарт харагдаж, гэр бүлийнхэнтэйгээ хамт цагийг өнгөрүүлсэн гэх мэдээлэл олон удаа гарсан. Гэхдээ Лиза болон Фредерик хоёр харилцаагаа албан ёсоор “найз залуу, найз охин” гэж батлаагүй хэвээр байна.
Фредерик бол зүгээр нэг тэрбумтны хүү биш. Бернар Арногийн таван хүүхэд бүгд LVMH-ийн томоохон албан тушаалд ажилладаг. Фредерик ч мөн адил гэр бүлийн бизнесийн хамгийн чухал салбаруудын нэгийг хариуцаж байна. Reuters-ийн мэдээлснээр, 2024 онд Фредерик болон түүний ах Александр нар LVMH-ийн ТУЗ-д орсноор Арно гэр бүлийн компанид эзлэх хяналт улам бэхжсэн.
Сонирхолтой нь, 2026 оны долдугаар сард Бернар Арногийн таван хүүхдийн хэн нь LVMH-ийг залгамжлан удирдах вэ гэсэн асуудал дахин хүчтэй яригдсан. Зарим хэвлэл Фредерикийг боломжит залгамжлагчдын нэг гэж онцолсон боловч Бернар Арно гэр бүлийн дунд “залгамжлалын дайн” явагдаж байгаа гэх мэдээллийг эрс няцаасан.
Л.Баяр
