Оюунгэрэл нэртэй олны танил эмэгтэйчүүд манайд олон бий. "Петровис"-ын Ж.Оюунгэрэл, загвар өмсөгч Г.Оюунгэрэл, "Орифлэйм"-ийн Г.Оюунгэрэл, сайд Ц.Оюунгэрэл гээд л. Энэ жил парламентын өнгө зүсийг өөрчилж, арван нэгэн эмэгтэй гишүүний нэг, гурван эмэгтэй сайдын нэг болсон сайд Ц.Оюунгэрэлийн 24 баримтыг хүргэж байна.
1. Хөдөө хөл нүцгэн тугал хариулж, үнээ сааж өссөн гэдэг Ц.Оюунгэрэл өдгөө 46 настай. Тэрбээр 1966 онд Хөвсгөл аймгийн Тариалан суманд төрсөн.2. Боловсрол: 1983 онд дунд сургуулиа алтан медальтай төгссөн. 1988 онд ЗХУ-аас эдийн засагч мэргэжлээр “улаан диплом”-той ирж байжээ.
3. Бас 1993, 2004, 2006 онуудад Москвагийн ОУБДС, АНУ-ын Стенфордын их сургууль, Йелийн их сургуульд суралцаж бизнесийн удирдлагын магистр, олон улсын бодлого судлалын мастерийн зэрэг хамгаалсан.
4. АНУ-д сурахын тулд 16 удаа тэтгэлэгт хөтөлбөрт саналаа илгээж байж Б.Обамагийн төгссөн Иелийн их сургуулийн оюутан болж байсан гэдэг.
5. Ц.Оюунгэрэл гэх энэ бүсгүйтэй бид анх "Америкийн өнгө" нэвтрүүлгээр танилцаж, "Америкт суралцсан тэмдэглэл" номоор нь нэрийг нь тогтоож байлаа.
6. Өндөр 170, жин 59 кг. Биеийн жингээ барихын тулд өглөөний цайндаа хоёр зүсэм талх л иддэг гэдэг.
7. Ном бол түүний ярианы мөнхийн сэдэв. Уулзсан бүхэн завшаан ашиглан түүнээс "Ногоон нүдэн лам", Миний ажлын ноу хау", "Гэрт болсон яриа" зэрэг номынх нь тухай асууна. Түүний ном олон удаа шилдэг борлуулалттай ном болж байжээ.
8. Олон хүн түүний “Ногоон нүдэн лам” номны үргэлжлэлийг хэзээ гарахыг асуудаг. Хариуд нь энэ дөрвөн жилд л биш гэж хэлж байгаа.
9. "Тунгалаг тамир 2" теле зохиомжийн зохиолыг бичжээ.
10. Бүтэн өрөө эзлэх номын сангаас гадна чихмэл тоглоомдоо маш их хайртай.
11. Тэрээр гадаад нөхөртэй. Түүний нөхөр хүний эрхийн хуульч бөгөөд Жеффри гэдэг. Тэд АНУ-д судалгааны ажил хийж байхдаа танилцжээ. 12. Том болсон хоёр охинтой. Ц.Оюунгэрэлийнх гэр Зайсанд амьдардаг.
13. Аяга, футболка цуглуулах хоббитой.
14. 1997 онд УИХ-ын дэд даргын туслах болж улс төрд хөл тавьсан. Монгол Улсын Ерөнхий сайдын шадар туслах, УИХ дахь МҮАН-МСДН-ын бүлгийн ажлын албаны дарга, МУ-ын Ерөнхий сайдын зөвлөх, Монгол Улсын Ерөнхийлөгчийн зөвлөх зэрэгт үүрэгт ажил хийж байсан. Мөн Ардчилсан Эмэгтэйчүүдийн Холбооны тэргүүн.
15. Яг одоо Шинэчлэлийн засгийн газрын ССАЖ яамны сайдаар ажиллаж байна. АН-ын олонх болсон Засгийн газар байгуулагдахад тэрбээр сайд болно чинээ бодоогүй гэжээ.
16. АНУ-руу алдагдсан Триназаурус батаарыг Монголд авчрах гэж хэд хоног нойргүй байх зуур нь сайдын жагсаалтанд нэрийг нь зоосон байсан гэдэг.
17. "Хүрэн толгойн сүүдэр" дууг дуулах дуртай.
18. Боловсрол, ажил мэргэжил, нийгэм дэх эмэгтэйчүүдийн оролцоо, орчны эрүүл мэндийн чиглэлээр 10 гаруй мянган хүнд лекц уншсан.
19. Ц.Оюунгэрэл Алтангадас одон, Эрх чөлөөний одон, 2011 оны онцлох зохиолч, 2007, 2008, 2009, 2010 оны шилдэг номын зохиолч гэсэн шагналтай.
20. Англи, орос хэлтэй.21. Түүний цахим хуудас 1 дүгээр сарын 08-ны өдрийн байдлаар хамгийн их хандалттай хуудсаар нэрлэгджээ. Нийт 22634 хандалттайгаар УИХ-ын гишүүдийн цахим хуудсуудыг тэргүүлж байгаа.
22. АНУ-руу алдагдсан Триназаурус батаарыг Монголд аврах ажлыг гардан хийж байна. Тэрээр өчигдөрхөн Ленинийн музейг чөлөөлж өгөхийг шаардаж дуугарчээ. Учир нь Триназаурус батаар ирээд тэнд байрлах юм.
23. ССАЖ-ны сайдаар ажиллаж эхлэхээс өмнө түүнийг олон нийтийн мэдээллийн хэрэгслээр ширүүхэн шүүмжилж байсан тохиолдол бараг үгүй. Харин саяхнаас түүнийг салбараа мэддэггүй сайд гэж хэд хэдэн мэдээллийн хэрэгслээр шүүмжлээд авсан. Гол нь түүнийг спортын салбарын талаар ямар ч мэдлэггүй гэж яриад байгаа.
24. Дутагдалтай зан: Сэтгэл тавгүйдэх үедээ ойр дотны бүх хүндээ уураа гаргадаг гэж нэгэн ярилцлагадаа дурджээ.
24tsag.mn
Сэтгэгдэл (34)