Оросын төмөр замын тэргүүн Владимир Иванович Якунин Монголд ирэх гэж байгаатай холбоотой нэлээд дуулиан дэгдээд байгаа. Монголд ирэхийнхээ өмнө аль нэг улсын Төрийн тэргүүн, Ерөнхий сайд шиг манай Ерөнхий сайдад хувийн захидал илгээж. Захидлыг нь ОХУ-аас Монголд суугаа Онц бөгөөд Бүрэн Эрхэт Элчин сайд манай Ерөнхий сайдад албан ёсоор гардуулан өгсөн байх юм. Тэгэхээр ийм нөлөөтэй Якунин гэгч хэн бэ?

1.   ОХУ-ын Ерөнхийлөгч Путиний итгэлтэй хүмүүсийн нэг Якунин цагтаа Ерөнхийлөгчийн тамгын газрын дарга, Зам тээврийн сайд, Ерөнхий сайдын албан тушаалд хүртэл томилогдож тун магадгүй гэгдэж явсан хүн юм.

2.   2000 оны эхний арван жилд Якунин манай хойд хөршийн хамгийн нөлөө бүхий албан тушаалтнуудын нэг байсан гэдэг.

3.  Сүүлийн үед Путиний итгэлт зарим хүн авлигын хэрэгт орооцолдож ихээхэн дуулиан тариад байгаа. Жишээлэхэд, Батлан хамгаалахыны сайд Сердюков.  Үүнтэй холбоотойгоор Путин ойрын хүрээлэл дундаа халаа сэлгээг нэлээд эрчимтэй хийж эхлэх байх гэж шинжээчид үзэж байна. Харин сөрөг хүчний мэдэгдэж байгаагаар Сердюковын араас суудлаасаа мултрах магадлал хамгийн өндөртэй хүн нь В.Якунин болоод байгаа аж. Учир нь ашигтай ажиллах компанийг 2005 онд хүлээж аваад улам хямруулж хаясан гэж ярьж байгаа юм.

4.  Якунин 2011 онд Оросын төмөр замын тэргүүнээр дахин сонгогдсон бөгөөд 2015 онд хүртэл ажиллах байх гэж оросууд таамагдаж байгаа.

5. Ноён Якунин “Smart Money” сэтгүүлд ярилцлага өгөхдөө “Who is Mr. Yakunin? Улстөрч үү эсвэл жирийн түшмэл үү?”  гэсэн асуултын хариуд “Би бол кентавр. Амьдрал намайг тийм болгосон юм” гэж хариулжээ. Кентавр нь Грекийн үлгэр, домогт гардаг морь биетэй,  хүн цээж, толгойтой хагас араатан, хагас хүн юм.

6.  Тэрээр өөрийгөө кентавртай харьцуулсан нь хүнлэг, ухамсартай, эвээр шийдэх, нөгөө талаас түрэмгий, хүчлэх дуртай, хий гэснийг олон юм бодолгүй шууд хийдэг зан чанараа илтгэсэн хэрэг.

7. Якунин овгийн Иваны хүү Владимир нь 1948 онд Владимир мужийн Захарово тосгонд төржээ.

8.   Бага залуу насаа тухайн үеийн Ленинград, одоогийн Петербург хотноо өнгөрөөсөн.

9.  1972 онд Ленинградын механикийн дээд сургуулийг “Нисдэг төхөөрөмжийн үйлдвэрлэл” мэргэжлээр төгссөн, механикийн инженер мэргэжилтэй, алсын тусгалтай баллистик пуужин зохион бүтээх, ашиглах салбарт мэргэшсэн.

10. КГБ буюу Улсыг аюулаас хамгаалах газрын дээд сургууль, одоогийн Гадаад тагнуулын албаны академид суралцан дүүргэсэн.

11.  Дараа нь, шинжлэх ухааны техникийн тагнуулын албанд нэлээд олон жил алба хашсан. Хашсан жилүүд нь 1985-1991 он.

12. Энэ зургаан жил Якунин нь НҮБ-ын дэргэдэх ЗХУ-ын байнгын төлөөлөгчийн газрын нэгдүгээр нарийн бичгийн даргын албыг хашиж байв.

13.   Оросын нөлөө бүхий хүмүүс түүнийг гүн хямралд ороод байсан Зөвлөлтийн тусгай албад барууны шинжлэх ухаан техникийн сүүлийн үеийн ололтыг тагнуулын хүчирхэг албаараа  дамжуулан хулгайлж гарцаагүй болоод байсан сүйрлийг бага ч болов хойшлуулахаар уйгагүй ажилласан. Энд нөхөр Якунины хүчин зүтгэл байсан нь ч гарцаагүй гэж ярьдаг.

14.   Басхүү түүнийг дээрээс өгсөн тушаалыг сайн биелүүлдэг, сайн бэлтгэгдсэн,  туршлагатай гүйцэтгэгч. Хий л гэсэн бол олон юм эргэцүүлж цаг алдалгүйгээр шууд хийж чаддаг хүн гэж тодорхойлдог.

15.    Зөвлөлт задран унасны дараагаар 1996 онд тэрээр “Нуур” нэртэй зуслангийн хоршооллыг хэдэн найзынхаа  хамт үүсгэн байгуулсан нь тун ч алсын хараатай алхам болжээ. Хоршооллын эзэд одоо бүгд өндөр албан тушаал хашдаг.

16.   2000-2002 он хүртэл ОХУ-ын Тээврийн яамны сайдын орлогч, арилжааны флот, тэнгисийн боомтуудыг үйл ажиллагааг хариуцан ажилласан.

17.  2002 оноос Зам тээврийн сайдын нэгдүгээр орлогч, 2005 оноос “Оросын төмөр зам” төрийн мэдлийн хувьцаат компанийн ерөнхийлөгчийн ажлыг хийж байна.

18.   Ажлыг хийж байхдаа нэгэн үе Иванов, Медведев нартай залгамжлагчийн суудлын төлөө хальт өрсөлдөөд авсан. Медведевт ялагдсан ч гэлээ Оросын төмөр зам компанийн ерөнхийлөгчийн суудлаа алдалгүй үлдэж чадсан тооцоотой эр.

19.  2005 онд “Орос улсын орчин үеийн геостратегийг боловсруулах механизмыг төмөр замын тээврийн салбарын жишээн дээр авч үзэх нь” сэдвээр эрдмийн зэрэг хамгаалсан.

20.  “Тээвэрлэлтийн улс төр зүй. Тээврлэлтийн хөгжлийн улс төрийн хэмжүүр” гэх мэт эрдэм шинжилгээний ажил бичсэн.

21.   2012 онд Олон улсын төмөр замын холбооны тэргүүлэгчээр сонгогдсон.

22.    Ер нь улс төрийн туршлага багатай хүн шууд, бэлтгэлгүйгээр уулзвал зажлахгүй залгих чадвартай нэгэн гэж түүнийг Оросын хэвлэлд тодорхойлжээ.

23.   Ноён Якунины манай Ерөнхий сайдад илгээсэн захидлы дундаас зарим сонин хэвлэл орчуулаад бүрэн эхээр нь нийтэлчихсэн. Тэгэхээр хоёр тал удахгүй явагдах хэлэлцээрт нэлээд ул үндэстэй бэлдсэн хэрэг. 

24.  В. Якунин "Монгол улсын шинэ төмөр замын бүтээн байгуулалтад  зориулан долоон тэрбум ам. долларын санхүүжилт гаргах боломжтой" гэж хэлж буй. Өөрөөр хэлбэл, нөгөө мөрөөдлийн буюу Монгол орны зүүнээс баруунтаа, өмнөөс хойд чигт татах төмөр замыг тэр чигт нь санхүүжүүлэхэд бэлэн гэжээ. Тэгэхдээ манай "Шинэ төмөр зам"-ын 49 хувийг дангаараа эзэмшинэ гэсэн саналыг тавиад байгаа юм.