Дуучин Т.Ариунаагийн нөхөр "Ноёд” группийн захирал Г.Буяндоржийг бусадтай нийлж их хэмжээний мөнгө угаасан, залилан хийсэн хэмээн цагдан хориод байгаа.  Гэвч хэргийг шалгах явцад Г.Буяндорж өөрөө ч хэн нэгэн этгээдэд залилуулсан байж магадгүй нөхцөл байдал үүсээд байгааг бид мэдээлж байсан.

Энэ талаар Х.Тэмүүжин сайд ч ам нээж орхисон. Тэрбээр “"Ноёд” группийн захирал Г.Буяндоржийг шалгах ажиллагаа үргэлжилж байна. Хэргийг шалгаж байхад Г.Буяндорж өөрөө ч хэн нэгэнд залилуулсан, гүтгүүлсэн байх нөхцөл байдал үүсээд байгаа. Ямартаа ч түүнийг цагдаагийн байгууллагаас дуудахад ирээгүй, оргон зайлсан учир цагдан хорьсон хэвээр байна” гэсэн юм.

Түүнийг ийн ярьсаны дараа өнөөх "Ноёд" констракшн"-ны захирал С.Билэгт “Эдний гэр бүл өрөвдүүлэх юм ярьсаар л явж байна. Харин би шалгагдаж байгаа хэргийн талаар янз бүрийн мэдээлэл тараагаад яахав гээд сууж байна. Би ч бас ярьвал ярина шүү дээ” гэх утгатай ярилцлага өгсөн юм.

Харин С.Билэгт яг Г.Буяндоржийг шалгагдаж эхэлсний дараа “Миний хувьд 2011 онд Г.Буяндоржоос "Ноёд" констракшн" гэдэг Сэлэнгэ аймагт бүртгэлтэй компанийг худалдаж авсан. Барилгын карказ төдий  байхад нь худалдаж аваад 13 давхар орон сууц болгосон. Гэтэл нэг өдөр Г.Буяндорж "Энэ миний компани" гээд  хууль бус шийдвэрийг шүүхээс гаргуулаад ирсэн” гэх утгатай зүйл хэлж байсан билээ.

Тэгвэл түүнийг хэвлэл мэдээллүүд өгсөн ярилцлагаас болсон уу, үнэхээр тэрбээр буруутай болж таарсан уу ямартаа ч цагдаагийн байгууллагаас шалгаж эхэлсэн байна. Тодруулбал,  "Ноёд" констракшн"-ны захирал С.Билэгтэд албан ёсоор эрүүгийн хэрэг үүсгэн Баянзүрх дүүргийн цагдаагийн хэлтэс шалгаж эхэлснийг баттай эх сурвалж мэдээллээ. Түүнийг бусдын хөрөнгийг хувьдаа завшсан гэдэг үндэслэлээр  эрүүгийн хэргийн 148-р зүйлийн хоёроор буутгажээ.

Зарим эх сурвалжийн хэлж буйгаар түүнийг "Ноёд" констракшн"-ны нэрийг барьж “Сэлэнгэ-888” орон сууцны байруудыг хууль бусаар дур мэдэн зах зээлийн ханшаас доогуур худалдаалсан учир ийн эрүүгийн хэрэг үүсгэсэн гэж байна. Ямартаа ч Г.Буяндоржийн залилуулсан, залилсан гэх хэргийг ард түмэн анхааралтай ажиглаж байгаа юм.

Дашрамд хэлэхэд, Г.Буяндоржийг хорих хугацаа ирэх сарын 8-нд дуусах юм. Гэвч өмнө нь хэд хэдэн удаа цагдан хорих хугацааг сунгасан учир ар гэрийнхэн нь болоод өмгөөлөгч нь үндэслэлгүйгээр хорьсон гэж үзэж шүүхэд ханджээ.