“Будапешт-2025” жүдо бөхийн ДАШТ-ий хоёр дахь өдөр өнөөдөр тохиож байна. Энэ өдөр эмэгтэй -52 кг жинд Л.Сосорбарам, эрэгтэй -66кг жинд Ё.Басхүү, Б.Эрхэмбаяр нар зодоглох юм. Тэднийг танилцуулж байна. 

Ёндонпэрэнлээн Басхүү

Өдгөө 31 настай тэрбээр дэлхийд данстай бөх билээ. 2021 онд одоо болж буй Будапешт хотоос анхны ДАШТ-ий медалиа хүртсэн нь хүрэл өнгөтэй байв. Улмаар 2023 оны Дохагийн ДАШТ-ээс дахин хүрэл медаль хүртсэн түүхтэй. Ё.Басхүү нь Их дуулга тэмцээнээс хоёр алт, гурван мөнгө, долоон хүрэл медальтай. Мөн Ази тивийн иж бүрэн медальтай манай улсын шилдэг жүдочдийн нэг гарцаагүй мөн. 

Баттогтохын Эрхэмбаяр

Жиндээ Ё.Басхүүг ч илүүрхээд байдаг энэ залуугийн ур чадвар дэлхийд танигдсан. 29 настай. ДАШТ-д тав дахь удаагаа оролцох гэж байна. Тэрбээр 2024 оны Азийн аварга. 2022 оны Улаанбаатарын Их дуулга тэмцээнээс алтан медаль хүртэж байв. Үүнээс гадна тэр Их дуулгаас хоёр мөнгө, гурван хүрэл  медальтай. 

Лхагвасүрэнгийн Сосорбарам

Өдгөө 24 настай тэрбээр 2019 оны Өсвөрийн ДАШТ-ий аварга. 2018 оны хүүхдийн олимпын наадмын мөнгөн медальтай. Одоогоор тэр Их дуулга ангилалд аваргалж үзээгүй ч дөрвөн мөнгө, гурван хүрэл медальтай. 2024 оны Азийн аварга. ААШТ-ээс нэг мөнгө, дөрвөн хүрэл медаль хүртэж байв. Азийн цомын тэмцээний гурван алт, гурван мөнгө, гурван хүрэлтэй. 

Л.Баяр