Он гарсанаас хойш зам тээврийн ослоор цөөнгүй хүн нас барсан юм. Тэгвэл энэ сар гарсанаас хойш дөрвөн хүн амиа алдсан талаарх мэдээлэл бидэнд ирлээ. Тухайлбал, энэ сарын 10-ны өдөр  18.00 цагийн орчим Чингэлтэй дүүргийн нутаг, 19-р хороо, Өвөр гүнтийн замд “Суурь” ХХК-ны "Isuzu Elf" 02-97 УБА дугаарын автомашины жолооч Б нь явган зорчигч 10 настай, эмэгтэй, 6-р ангийн сурагч Б –г мөргөж амь насыг нь хохироожээ.  Мөн энэ сарын 14-ний өдөр буюу Гэгээн хайрын өдөр Сонгинохайрхайн дүүргийн 19 хороо Үйлдвэрчний эвлэлийн гудамж, Депогийн баруун замд амины "Nissan Pulsar" маркийн 74-73 УБН дугаартай автомашины жолооч  Н нь явган зорчигч С-г мөргөж амь насыг нь хохироожээ. Түүнчлэн,  энэ сарын 20 буюу өнгөрсөн долоо хононгт СБД-ийн нутаг Япон цэргийн цогцолборын хойд замд марк дугаар тодорхойгүй автомашины жолооч нь 55 настай явган зорчигч, эрэгтэй Б -г мөргөж амь насыг хохироогоод хэргийн газрыг орхин явжээ.Үүгээр зогсохгүй,  энэ сарын 21-ны өдөр ХУД- ийн 11 хороо Зайсангийн хорих ангийн зүүн замд “КИАЙ ГРУПП ХХК-ны” Toyota Land Cruiser Prado маркийн 74-87 УНӨ дугаартай автомашины жолооч Н баригдаж байгаа барилгын суурь тавьсан нүх рүү унаж жолооч Н, зорчигч Д  нарын 2 хүн нас барж зорчигч Г нарын 8 хүн гэмтсэн байна.

Эдгээр хэргүүдийн талаар цагдаагийн байгууллагын эх сурвалжаас тодруулахад "Дээрх хэргүүдэд эрүүгийн хэрэг үүсгэн шалгаж байгаа. Энэ сар гарсанаас хойш Зам тээврийн ослын дуудлага нэмэгдэж байна" гэв.