Иргэний нисэхийн ерөнхий газар сүүлийн нэг жилийн хугацаанд 70 ажилтнаа халсан гэх мэдээллийн эргэн тойронд бид хэд хэдэн мэдээллийг хүргэж байсан.

Улмаар ИНЕГ-аас халагдсан иргэд хуулийн байгууллагуудад хандсан бөгөөд тэд  гурван шатны шүүхийн шийдвэрлэлт хүртэл ажилчдын талд гараад байхад удирдлагууд нь энэ шийдвэрийг үл тоож биелүүлэхгүй байгааг онцолсоор байгаа.

Түүнчлэн, халагдсан ажилчдаас ШШГЕГ-аар албадан асуудлаа шийдүүлж буцаад ажилдаа орсон хүмүүс ч байгаа аж. Гэвч тун удалгүй дахиад халчихдаг гэж ярьж байсан юм.

Тэгвэл энэ салбарыг мэргэжлийн бодлогыг алдагдуулан, хүний эрхийг зөрчиж байна гэсэн мэдээллийн дагуу оны эхэнд Зам, тээврийн яамнаас Ажлын хэсэг томилж, тус газарт шалгалт хийсэн юм. Тус Ажлын хэсэг энэ сарын 17-нд дүгнэлтээ гаргаж, оны өмнө ИНЕГ-аас хууль бусаар халагдсан зургаан албан хаагчдыг ажилдаа эргэн орох үндэслэлтэй гэж үзжээ.

Зам тээврийн яамнаас ИНЕГ-ын удирдлага ажил үүрэгтээ хайнга хандаж, нотлох баримтгүйгээр зарим ажилтнаа ажлаас халсан нь тогтоогдсон тул тэднийг хуучин эрхэлж байсан албан тушаалд нь эргүүлэн томилох тухай ИНЕГ-ын удирдлагуудад хүргүүлжээ.

ИНЕГ-ын даргаар ажиллаж байсан С.Буяндалай олон жил ажилласан ажилчдаа хоморголон халж, тэдний оронд УИХ-ын бие даагч гурван гишүүний ах дүү, амраг саданг авсан байдаг. Мөн  ИНЕГ-ын Тамгын хэлтсийн дарга Т.Мөнх-Од нь УИХ-ын гишүүн Х.Болорчулууны жолоочийн хүү, Б.Ган-Очир нь Т.Мөнх-Одын найз.  ИНЕГ-ын харьяа Газрын үйлчилгээний албаны  Захиргааны хэлтсийн дарга Г.Энхчулуун нь УИХ-ын гишүүн С.Ганбаатарын найз. Г.Энхчулууны эхнэр Г.Батцэцэг нь ИНЕГ-ын харьяа Нисэхийн эмнэлэг, сэргээн засах сувиллын дарга, дүү эмэгтэй нь нягтлан, хүргэн нь жолоочоор ажиллаж байгаа нь Нийтийн албанд нийтийн болон хувийн ашиг сонирхолыг зохицуулах, ашиг сонирхолын зөрчлөөс урьдчилан сэргийлэх тухай хуулийг зөрчсөн байна.

Дашрамд хэлэхэд, АТГ-т ИНЕГ-аас таван албан хаагч шалгагдаж байгаа юм.