Найз залуудаа 48 цаг зодуулж амиа алдсан гэх талийгаач Цэдэн-Ишийн үхлийн шалтгааныг тодруулах, дахин шинжилгээний хариу өчигдөр гарсан. Хохирогчийн ар гэрийнхнийх нь хүсэлтээр болон Монгол Улсын Ерөнхийлөгчийн өгсөн дахин нягтлах үүргийн дагуу Хууль зүйн яамнаас томилогдсон ажлын хэсэг дүгнэлтээ гаргаж, энэ хэрэг дээр ажиллаж байсан мөрдөн байцаагчдад хүлээлгэн өгсөн байна.

Тодруулбал, тусгай ажлын хэсгээс гаргасан дахин шинжилсэн дүгнэлт, хэрэг шалгагдаж байгаа Сүхбаатар дүүргийн цагдаагийн хоёрдугаар хэлтэст хүргэгдсэн. Гэхдээ хэрэг мөрдөн байцаах шатандаа явагдаж байгаа учир шүүх шинжилгээний дүгнэлтийг үзүүлэх боломжгүй гэж ШШҮХ-гээс мэдээлсэн. Харин дахин шинжилгээний дүнг өөрчлөгдсөн эсэхийг лавлахав мөн л тодорхой хариулт өгөөгүй юм.

Хэрэв шүүхийн дахин шинжилгээний дүн өмнөхөөсөө өөр  гарвал буруу дүгнэлт гаргасан шинжээчид хариуцлага тооцох юм. Энэ удаагийн дүгнэлийг ШШҮХ-гийн дэд даргаар ахлуулсан, гэмтэл болон салбар бүрийн мэргэжлийн зургаан эмч нарын шинжээчдийн баг хохирогчийн шарилыг хөндөж дахин шинжилгээ хийсэн байна.

Түүнчлэн өчигдөр талийгаачийн шинжилгээний хариуг архитай холбоотой гэж гарсан талаар хэвлэл мэдээллээр цацагдсан. Тэгвэл энэ талаар хохирогчийн нагац эгч Н.Сүрэнхорлоотой  холбогдож тодруулахад "Архи дарс ууна гэсэн ойлголт ерөөсөө байхгүй. Бид бүгдээрээ архигүй орчинд өссөн. Ер нь ээж, аав нь ч архи дарс хэрэглэдэггүй" гэв. Харин хуульч М.Ичинноров "Эмэгтэйчүүдийн үйлдэгддэг гэмт хэрэг дээр эмэгтэйчүүдийг өөрсдийг нь буруутгадаг. Тухайлбал, хүчингийн хэрэг дээр эмэгтэй хүнийг яагаад богино юбка өмссөн юм, яагаад архи уусан юм гэх мэтээр хэлдэг. Тэр нь эрчүүдэд ял завшах боломжийг олгодог. Цэдэн-Ишийн хэрэг дээр ч энэ байдлыг их ашиглаж байна" гэв.

Юутай ч ар гэрийнхэн болоод өмгөөлөгчийнх нь зүгээс талийгаачийн шинжилгээний хариу архитай холбоотой гараагүй гэдгийг албан ёсоор хэллээ.