Өнгөрсөн сарын 27-нд Сүхбаатар аймгийн Онгон суманд шүлхий өвчин гарснаар өнөөдрийн байдлаар Сүхбаатар аймгийн Онгон, Наран, Дарьганга, Баяндэлгэр, Түвшинширээ, Асгат гэх зургаан сумдад 1973 үхэр өвчилснөөс 1973, Хэнтий аймгийн Галшар суманд 388 үхэр өвчилснөөс 338, Дорноговь аймгийн Алтанширээ, Дэлгэрэх, Иххэт, Сайншанд, Айраг сумдад 552 үхэр өвчилснөөс 547 үхрийг устгасан байдалтай байгаа. Улмаар нийт 3 аймгийн 12 суманд 2913 үхэр шүлхий өвчнөөр өвчилснөөс 2908 үхрийг зориудаар устгаж, дээрхи сумдын нийт 2202086 толгой малд шүлхий өвчнөөс урьдчилан сэргийлэх вакцин хийж, хорио цээрийн дэглэм тогтоон 295 цэгт 1425 хүн 285 техник хэрэгсэлтэйгээр ажиллаж байна.

Өмнөх өдрөөс Сүхбаатар аймагт 49, Хэнтий аймагт 7, Дорноговь аймагт 45, нийт 101 мал нэмж өвчилж, 28294 малыг вакцинжуулан, 5 малыг устгахаар ажиллаж байгааг НОБГ-аас мэдээллээ.

Авто тээврийн шалган бүртгэх товчоодын хувьд, Улаанбаатар хот орчмын Хэрлэн, Багахангай, Тэрэлжийн уулзвар, 4 дүгээр зөрлөг, Эмээлт, Яармаг, Баруун турууны товчоодод байнгын хяналтын 8, ариутгал халдваргүйжүүлэлтийн 4 цэгт Хэв журмын цагдаа тав, Замын цагдаа долоо, Онцгой байдлын ажилтан тав, Мэргэжлийн хяналтаас найм, Мал эмнэлэгийн ажилтан 10 хүн, албан хаагч 12 автомашинтайгаар хяналт шалгалтыг явуулж байна. 607 тээврийн хэрэгсэл, 2392 зорчигчдод үзлэг шалгалт хийж, 610 ширхэг сэрэмжлүүлэг тараан, Хэрлэн, Тэрэлжийн уулзвар, Налайх 4 дүгээр зөрлөг, Яармагийн постуудад 552 тээврийн хэрэгсэлд ариутгал халдваргүйжүүлэлт хийн, голомтын бус бүсээс 4.2 тн үхрийн мах, 13.225 тн хонины мах, 1.2 тн адууны мах, 9.4 тн ямааны мах, 1.8 тн тэмээний мах, 9.3 тн дайвар бүтээгдэхүүн, 128000 ширхэг өндөг, 10 тн шар буурцагны мах орлуулагч илрүүлэн үзлэг хийж, мал эмнэлэг, ариун цэврийн гарал үүслийн гэрчилгээг үндэслэн нэвтрүүлсэн байна.