Өмнөд Солонгосын Канвон мужийн Пёнчан дүүрэгт 2018 оны өвлийн олимпийн наадам зохион байгуулагдах билээ. БНСУ өмнө нь зуны олимп зохион байгуулж байсан. Харин түүхэндээ анх удаа өвлийн олимп хүлээн авах болж байна. Өвлийн спортыг их баяр наадмын төлөвлөгөө ёсоор 2018 оны хоёрдугаар сарын 9-нд эхэлнэ. Олимпийн тэмцээн, уралдаанууд нийт 13 цэнгэлдэх, талбайд болох ажээ.
  Буддизмын сүмээрээ алдартай энэ газар Сөүл хотоос зүүн зүгт 180 километрийн зайтай оршдог. Өргөн уудам газар нутагтай энэ бүс нутаг нь далайн түвшнээс дээш 750 метрийн өндөрлөгт оршдог бөгөөд нутаг дэвсгэрийн 84 хувь нь уулархаг юм.
Чийглэг, дулаан уур амьсгалтай энэ газрын хуурай, сэрүүн өвөл удаан хугацаанд үргэлжилдэг. “Сеораксан” уулын өмнөд хэсэгт уулчид очдог гэдгээрээ алдартай. 1,47 километр урт үргэлжлэх “Алпенсиа” хэмээх цанын бааз нь жилийн турш нээлттэй.

 2018 оны олимпийн наадмыг угтаж концертын танхимыг барьж байгуулаад эхэлжээ. Цагт 250 километрийн хурдтай галт тэргээр нийслэл Сөүл хотоос 50 минут яваад Пёнчанд очих боломжтой.

2018 оны өвлийн олимпийг зохион байгуулахаар Франц, Германы хотуудтай өрсөлдөж ялалт байгуулжээ. Энэ нь өвлийн олимп зохион байгуулж буй Азийн гурав дахь хот юм. Өмнө нь 1972 онд Японы Саппоро, 1998 онд Японы Наганод зохион байгуулж байжээ.
Мөн 1992 оны Францын Албертвиллийн олимпиос хойш хоёр дахь удаагаа цанын баазад болох олимп гэдгээрээ онцлог. Олимпийн наадмыг зохион байгуулахаар зочид буудал болон бусад дэд бүтцийн ажлуудыг хийж эхэлжээ. Өмнө нь Пёнчанд 31 орны 123 тамирчин оролцсон соёлын хөтөлбөрийг зохион байгуулж байсан юм.