Өнгөрсөн арваннэгдүгээр сарын 17-нд Монгол улсын ерөнхийлөгчөөс санал болгосны дагуу УИХ-аас томилогдсон Авлигатай тэмцэх газрын шинэ удирдлагууд ажлаа авсан даруйдаа бүтцийн өөрчлөлт хийж эхэлсэн билээ. Удирдлагуудын эхний томилгоо, АТГ-ын Гүйцэтгэх албаны дарга Ө.Алтангадасын оронд Үндэсний аюулгүй байдлын зөвлөлд ажиллаж байсан Н.Эрдэнээг томилох байв. Ингээд дараа нь арваннэгдүгээр сарын 21-нд Тамгын хэлтсийн дарга Г.Бадарчийг халж, оронд нь Үндэсний аюулгүй байдлын зөвлөлийн Ажлын албаны даргын орлогчоор ажиллаж байсан Ц.Өнөрбаярыг томилсон юм. Өөрөөр хэлбэл, АТГ-ын дарга Н.Ганболд, дэд дарга Б.Хурц нар ажлаа аваад ердөө дөрөвхөн хоноод хамгийн анхных нь халаа эхэлсэн билээ. Тухайн үед Г.Бадарчаас дээрх томилгооны талаар асуухад "АТГ-ын дарга бүрэн эрхийнхээ хүрээнд энэхүү томилгоог хийсэн. Миний хувьд АТГ-аас бүрмөсөн гарч байна. Одоогоор аль нэг байгууллага, ямар нэг албан тушаалд очоогүй" гэх хариулт өгч байсан. Үүний дараахан буюу энэ сарын 2-нд ажлаас чөлөөлөх 51 дүгээр тогтоол үйлдэж, Хэвлэл мэдээллийн ажилтан Ц.Эрдэнэцэцэг, Ч.Сангарагчаагийн шадар хамгаалагч Д.Батбаяр, Д.Сундуйсүрэнгийн жолооч Г.Зоригттөгөлдөр, тоо бүртгэлийн ажилтан Ч.Наранцэцэг, 1919 гомдол мэдээллийн оператор Г.Өлзийсайхан, Ч.Хүдэрчулуун, Архив, бичиг хэргийн ажилтан Б.Туяа нарын долоон ажилтныг бүтцийн өөрчлөлт нэрийдлээр халсан юм. Халаа, сэлгээ үүгээр дууссангүй. Үүнээс гурав хоногийн дараа буюу арванхоёрдугаар сарын 5-нд төвшин тогтоох шалгалт авч тэнцээгүй гэдэг үндэслэлээр Мөрдөн шалгах хэлтсийн хоёрдугаар тасгийн дарга Н.Батзогсох болон Ж.Халиун, Д.Золжаргал, П.Шижир зэрэг найман мөрдөн байцаагчийг үүрэгт ажлаас нь чөлөөлсөн. Төвшин тогтоох шалгалтад тэнцээгүй нэрийн дор ажлаас чөлөөлөгдсөн мөрдөн байцаагчид тухайн үед шалгалтынхаа тестийн хариуг үзэхээр АТГ-ын Тамгын хэлтсийн дарга Ч.Өнөрбаярт хандахад "Шалгалтын дүнг харуулах боломжгүй" гэхээс өөр зүйл хэлээгүй гэдэг. Үүнийг шалгалтад тэнцээгүй гэх нэрийдлээр өнгөлөн далдаж, үндэслэлгүйгээр халж буй хэрэг хэмээн хардах хүн цөөнгүй байсан. Хамгийн сүүлд л гэхэд энэ сарын 16-нд Гүйцэтгэх албаны ажилтан Ж.Өсөхбаяр, Ц.Энхбаатар болон ерөнхий нягтлан бодогч Ч.Оюунсүрэн зэрэг гурван хүнийг үүрэгт ажлаас нь чөлөөлсөн байна. Эх сурвалжийн мэдээлснээр, гүйцэтгэх албаны дээрх хоёр ажилтан урьд нь Б.Хурцад холбогдох хэргийг шалгаж байжээ. Тэднийг үүрэгт ажлаас нь чөлөөлөхдөө ямар ч бүтцийн өөрчлөлт, төвшин тогтоох шалгалт ярилгүйгээр шууд л "Хамтарч ажиллах боломжгүй, ажлаа өг" хэмээн хүчээр өргөдлийг нь бичүүлсэн гэдэг. Мөн АТГ-ын гадаад харилцааны ажилтан О-г АНУ-ын нэр хүндтэй их сургуульд суралцаж байхад нь мөн л ажлаас нь халжээ. Тэр ч бүү хэл тусгай чиг үүргийн байгууллага бүрт байдаг нууцын ажилтнаа ч бүтцийн өөрчлөлт нэрээр халсан гэх. Уг нь АТГ бүтэцдээ өөрчлөлт оруулахаар бол 45 хоногийн өмнө УИХ-д мэдэгдэх хуулийн заалт бий. Гэвч уг заалтыг шинэ удирдлагууд үл ойшоон халаа, сэлгээнийхээ ажлыг үргэлжлүүлээд зогсохгүй арав гаруй хүнийг сонгон шалгаруулалтгүйгээр ажилд авсан гэх мэдээлэл байна. Шинэ ажилтан авах байсан бол хуучин ажилчдаа халах ёсгүй л баймаар. АТГ-ын дарга нарын хэлснээр тэд энэ ондоо багтааж, бүтцийн өөрчлөлтөө хийж дуусгах бөгөөд 2012 оны нэгдүгээр сараас шинэ бүтэц, бүрэлдэхүүнээрээ ажиллаж эхлэх гэнэ. Эх сурвалжийн мэдээлснээр, халагдсан болон ажлаас гарах хүсэлтээ өгсөн алба хаагчийн тоо өдгөө 40-д хүрчээ. Албан ёсоор халагдсан нь 20 бол АТГ-ын дарга Н.Ганболд, Б.Хурц нартай хамтран ажиллах хүсэлгүй хэмээн өөрийн хүсэлтээр өргөдлөө өгсөн 20 хүн байгаа аж. Орон тооны цомхотгол болон элдэв дарамтад автаж, сайн дураараа халагдах өргөдлөө бичсэн албан хаагчдад төрийн албаны тухай хууль болон Хөдөлмөрийн хуулийн дагуу зургаан сарын цалинтай тэнцэх хэмжээний мөнгө олгосон байна. Харин үүрэгт ажлаасаа чөлөөлөгдсөн ч халагдах өргөдлөө өгөөгүй байгаа ажилтнууд нь төрийн албаны зөвлөлд хандаад байгаа аж. Энэ талаар төрийн албаны зөвлөлийн дарга Д.Зүмбэрэллхамаас тодрууллаа.
- АТГ-аас халагдсан алба хаагчид танайд хандсан гэсэн. Өнөөдрийн байдлаар хичнээн хүн ямар ямар үндэслэлээр хандаад байна вэ?
- Энэ сарын 23-нд буюу өнгөрсөн баасан гаригт АТГ-т ажиллаж байсан алба хаагчид хууль бусаар ажлаас халсан гэдэг үндэслэлээр манайд гомдол гаргасан. Уг гомдолд нэр бүхий есөн хүний нэр байсан.
- Тэдний гомдлыг хэдий хэр хугацаанд хянан, шийдвэрлэх вэ?
- Хуульд зааснаар өргөдөл, гомдлыг нэг сарын дотор хянан, шийдвэрлэх ёстой. Гэхдээ эдгээр хүмүүс өргөдөлдөө ямар материал хавсаргасан байгааг нь сайн мэдэхгүй байна. Тийм учраас материалуудыг нь хянаж байж л хэдий хэр хугацаанд шийдвэрлэнэ гэдгийг хэлэх боломжтой. Одоо бол анхны ажиллагааг л хийж эхэлж байна. АТГ-ын ажилтнуудын гомдлыг тусгайлан хурдан хугацаанд шийдвэрлэнэ гэсэн ойлголт байхгүй бусадтай л ижил түвшинд авч үзнэ.
- Тэднийг ажлаас нь хууль бусаар халсан байвал яах вэ?
- Хууль бусаар ажлаас халсан гэдэг нь тогтоогдвол буцааж ажилд нь томилох тухай шийдвэрийг манай зөвлөлөөс АТГ-т хүргүүлнэ.
- Ажлаас халагдсан иргэдийг Захиргааны хэргийн шүүхэд хандсан гэж байсан. Тэд энэ талаараа хэлсэн үү?
-Тэд Захиргааны хэргийн шүүхэд хандах хараахан болоогүй байгаа. Яагаад гэхээр, манай зөвлөлөөс ямар шийдвэр гарах эсэхээс шалтгаалж шүүхэд хандах учиртай. Хэрвээ манай шийдвэр гомдол гаргасан хүмүүсийн талд гарвал тэд шүүхэд хандах шаардлагагүй л дээ. Харин тэдний эсрэг гарвал шүүхэд хандах байх.
- Шийдвэр тэдний талд гарч, ажилд нь буцааж томилуулах гэхэд тухайн байгууллага нь хүлээж авахгүй бол яах вэ?
-Тэгвэл мөн Захиргааны хэргийн шүүхэд хандах боломжтой.
